Otandyq jedel járdem qyzmetinde ÝDZ apparattary alǵash ret qoldanyla bastady
PAVLODAR. KAZINFORM - Pavlodar oblysynda jedel járdem brıgadalary portatıvti ýltradybystyq zertteý apparattarymen jabdyqtaldy. Bul – Qazaqstanda jedel medıtsınalyq járdem qyzmetine ÝDZ tehnologııasyn engizý boıynsha alǵashqy tájirıbe.
Óńirlik densaýlyq saqtaý basqarmasynyń basshysy Ermek Kýchýkovtyń aıtýynsha, Pavlodar men Aqsý qalalaryndaǵy qosalqy stantsııalarǵa bes zamanaýı qurylǵy berilgen. Olardy qoldaný úshin 45 dáriger arnaıy daıarlyqtan ótip, sertıfıkat alǵan.
Jańa tehnologııanyń kómegimen dárigerler naýqastyń jaǵdaıyn oqıǵa ornynda 2-3 mınýt ishinde teksere alady.
- Úsh aptada mamandar 900-ge jýyq zertteý júrgizgen. Sonyń nátıjesinde aýyr preeklampsııa, platsentanyń merziminen buryn ajyraýy jáne ishki aǵzalardyń jaraqaty sııaqty shuǵyl jaǵdaılardy der kezinde anyqtaýǵa múmkindik týǵan, - deıdi óńirlik jedel járdem stantsııasynyń basshysy Qanadan Ahmetjanov.
Taǵy bir ereksheligi – ÝDZ apparattary jedel járdemniń biryńǵaı koll-ortalyǵymen biriktirilgen. Osylaısha, aǵa dáriger zertteý nátıjelerin naqty ýaqyt rejıminde baqylap, áriptesterine dıagnozdy naqtylaýǵa kómektesedi.
Pavlodarlyq tájirıbe Densaýlyq saqtaý mınıstrligine tanystyrylǵan. Qazir bul jobany elimizdiń basqa óńirlerine taratý máselesi qarastyrylyp jatyr.
Buǵan deıin elimizde alǵashqy medıtsınalyq kómek qalaı damyp kele jatqany týraly jazǵanbyz.