Otandyq zaýyttan shyqqan 16 myń tonna asfalt-beton talapqa saı kelmegen
ASTANA. KAZINFORM – Jyl saıyn jol qurylysy bastalarda eldegi asfalt-beton zaýyttary tekserýden ótedi. Bul týraly QR Kólik mınıstrligi «Jol aktıvteri sapasynyń ulttyq ortalyǵy» RMK basshysy Bolatbek Aıtbaev málim etti.
Ortalyq jumystar men materıaldar sapasyna ekspertıza júrgizedi, avtokólik joldaryna dıagnostıka jasaıdy jáne ortasha remontqa vedomstvolyq taldaý júrgizedi.
Elimizdiń árbir óńirinde ortalyqtyń halyqaralyq standarttar boıynsha akkredıttelgen zerthanalary bar 20 fılıaly jumys isteıdi.
«Bıylǵy jyldyń negizgi jańalyǵy – qurylys maýsymy qarsańynda eldegi asfalt-beton zaýyttaryna aýqymdy tekserý júrgizý boldy. Revızııa 382 zaýytty qamtydy, onyń ishinde 109 zaýyt talaptarǵa tolyq sáıkes keldi. Qalǵan 273 zaýytqa usynymdarǵa saı bolý týraly nusqaýlyq berildi, ázirge onyń 127-si nusqaýlyqty oryndap, shyǵaratyn ónim sapasyn kóterý sharalaryn júrdi», - dedi B. Aıtbaev Úkimet otyrysynda.
Onyń aıtýynsha, mundaı tekserýler jyl saıyn qurylys maýsymy bastalarda júrgizilip otyrady jáne barlyq óńirge habar berildi.
Tekserý nátıjesinde 16 myń tonna asfalt-beton, 27 myń tonna ıntertti materıal jáne 3 myń tonna bıtým paıdalanýǵa jiberilmedi. Ásirese talaptarǵa saı kelmeý Jambyl, Túrkistan, Abaı oblystarynda baıqalǵan.
Merdiger uıymdar 99 myń sharshy metr asfalt-beton jabynyn, 28 myń sharshy metr jol tabanyn qaıta tósegen, 18 myń tekshe metr qıyrshyq tasty aýystyrǵan.
Sonymen birge, joldar men qurylys materıaldary sapasynyń taldaýyna, nátıjesine adamı faktor yqpalyn azaıtý úshin ortalyq Kazroadlab avtomattandyrylǵan baqylaý júıesin ornatty. Qazirgi ýaqytta júıe 4 oblysta iske qosylǵan jáne 2025 jyly barlyq óńirge engiziledi.
