Jas ánshiler Belarýstegi «Hali-Halo» baıqaýynda júldeli oryndar ıelendi
ASTANA. KAZINFORM — Belarýstiń Novopolotsk qalasynda estradalyq án oryndaýshylarynyń XXI halyqaralyq «Hali-Halo» jasóspirimder baıqaýy ótti, dep habarlaıdy Mádenıet jáne aqparat mınıstrliginiń baspasóz qyzmeti
Іs-sharaǵa Qazaqstan, Belarýs jáne Reseıdiń daryndy jastary qatysty.
— Qazaqstannyń atynan óner kórsetken qatysýshylar kásibı sheberligimen erekshelenip, júldeli oryndarǵa ıe boldy. Atap aıtsaq, orta jas sanaty boıynsha Astana qalasynyń jas vokalısi Dámeli Birjanova «Muny nege bilmeısiń?» atty kompozıtsııasyn oryndap, I oryn ıelendi. Joǵary jas sanaty boıynsha Qazaqstandy Ámına Janat tanystyrdy. Ol «Qazaǵym-aı» jáne aǵylshyn tilindegi «Mamma Knows Best» ánderin oryndap, II orynǵa ıe boldy, — delingen habarlamada.
Baıqaý qatysýshylarynyń ónerin Qazaqstan, Belarýs, Armenııa jáne Grýzııanyń eńbek sińirgen óner qaıratkerleri, sondaı-aq jetekshi pedagogtar, ártister men prodıýserler baǵalady.
Qazaqstan atynan qazylar alqasynyń quramynda Roza Baǵlanova atyndaǵy «Qazaqkontsert» memlekettik kontserttik uıymynyń solısi, Kúlásh Baıseıitova atyndaǵy Qazaq ulttyq óner ýnıversıtetiniń «Vokaldyq óner» kafedrasynyń oqytýshysy Ibrahım Ámın boldy.
Budan buryn Astanada Azııadaǵy alǵashqy iri vokaldyq megajoba – Silk Way Star jobasynyń jartylaı fınaly aıaqtalǵanyn jazǵan edik.
