Otandyq túlekterge Azııa–Tynyq muhıty óńiri elderinde bilim alyp, jumys isteı alady
ASTANA. KAZINFORM — Búgin Memleket basshysy joǵary bilim berý salasyndaǵy biliktilikterdi taný jónindegi Azııa–Tynyq muhıty óńirlik konventsııany ratıfıkatsııalaý týraly Zańǵa qol qoıdy.
Ǵylym jáne joǵary bilim mınıstri Saıasat Nurbektiń sózinshe, bul Qazaqstan úshin mańyzdy ári naqty nátıjege baǵyttalǵan qadam.
— Konventsııa dıplomdar men biliktilikterdi ózara taný rásimderin jeńildetip, qazaqstandyq túlekterge Azııa–Tynyq muhıty óńiri elderinde bilim alý men jumys isteýge keńirek múmkindik berip, sheteldik stýdentter úshin otandyq ýnıversıtetterge jol ashpaq. Bul sheshim joǵary bilim berý júıemizdiń halyqaralyq básekege qabilettiligin arttyryp, stýdentter men oqytýshylardyń akademııalyq utqyrlyǵyn kúsheıtedi jáne Qazaqstandy óńirlik bilim berý haby retinde odan ári nyǵaıtady. Bilimge negizdelgen jahandyq ekonomıka jaǵdaıynda mundaı qadamdar adamı kapıtaldyń damýyna jáne eldiń uzaq merzimdi ósimine tikeleı qyzmet etedi, — dedi Saıasat nurbek.
Budan buryn Saıasat Nurbek óńir ákimderinen JOO-lardy kompıýtermen jabdyqtaý úshin qarajat bólýdi ótingenin jazǵanbyz.