Otandyq taýarlardy ilgeriletý úshin 50 memorandýmǵa qol qoıyldy – Qanat Sharlapaev
ASTANA. KAZINFORM – Qazaqstandyq taýarlardy marketpleıster arqyly ilgeriletý baǵytynda jańa jobalar iske asyrylyp jatyr. Bul týraly «Atameken» ulttyq kásipkerler palatasynyń basqarma tóraǵasy Qanat Sharlapaev málim etti.
Onyń aıtýynsha, otandyq ónimderdi saýda jelilerine, elektrondyq saýda alańdaryna jáne eksport naryqtaryna shyǵarýdyń biryńǵaı tártibi qalyptasyp jatyr. Bul jumys ulttyq palata, Saýda jáne ıntegratsııa mınıstrligi jáne óńirlermen birlesip júrgizilip keledi.
– Byltyr óńdeý ónerkásibi qaýymdastyqtarymen jáne Saýda mınıstrligimen jelilerdegi otandyq taýarlardyń keminde 30%-dyq úlesin qamtamasyz etýge baǵyttalǵan zańnamalyq túzetýler engizildi. Atalǵan normanyń óńirlerde tıimdi iske asyrylýyna múmkindik jasaý úshin bıyl barlyq óńirde úshjaqty 50 memorandýmǵa qol qoıyldy, – dedi Qanat Sharlapaev.
Onyń sózinshe, qazaqstandyq brendterdiń elektrondyq saýda alańdaryndaǵy úlesin arttyrý maqsatynda birqatar jobalar qolǵa alynǵan. Atap aıtqanda, Lamoda Kazakhstan platformasymen otandyq brendterdi marketpleıske shyǵarý boıynsha joba iske qosylady.
Sonymen qatar «Jana post» kompanııasymen qazaqstandyq taýarlardy Qytaıdyń elektrondyq saýda alańdaryna shyǵarý jumystary júrgizilip jatyr. «Qazposhtamen» birlesken joba da qarastyrylyp jatyr. Bul bastamalar aýyldyq jerlerdegi óndirýshilerdiń ónimderin iri qalalarǵa jáne syrtqy naryqtarǵa jetkizý múmkindigin keńeıtýge baǵyttalǵan.
Aıta keteıik, Memlekettik kirester komıteti qandaı marketpleısterge jańa kedendik talap qoıylmaıdy.
