Otandyq taýarlardy ilgeriletý úshin 5 transshekaralyq hab salynady
ASTANA. KAZINFORM – Investorlardy tartý ortalyqtaryna aınalatyn 5 transshekaralyq hab salynady. Bul týraly Saýda jáne ıntegratsııa mınıstrliginiń keńeıtilgen alqa májilisinde vedomstvo basshysy Arman Shaqqalıev aıtty.

— Qazaqstandyq taýarlardyń eksportyn ilgeriletý úshin qajetti ınfraqurylym salynyp jatyr. Investorlardy tartý ortalyqtaryna aınalatyn jáne kórshi eldermen shıkizattyq emes eksporttyń ósýine múmkindik beretin 5 transshekaralyq hab salynatyn bolady. Syrtqy ınfraqurylymdy qalyptastyrý boıynsha aýqymdy jumys júrgizilde. Elshilikterdiń qoldaýymen Qytaıda 2 seriktes kórme alańdary iske qosyldy jáne Úrimshi qalasynda saýda ókildigi ashyldy. Dýbaıda «Qazaq Trade House» saýda úıi jumysyn bastady, - dedi vedomstvo basshysy.
Mınıstrdiń atap ótýinshe, Birikken Arab Ámirlikteri, Aýǵanstan, Tájikstan, Italııa, Ózbekstan, Reseı jáne Qyrǵyzstandy qosa alǵanda, negizgi seriktes elderde 10 saýda-ekonomıkalyq mıssııa uıymdastyryldy.
— Eksportty ilgeriletýdegi mańyzdy qadam — aımaqtandyrý qaǵıdaty boıynsha jańa tásili engizildi. Sondaı-aq, Úrimshimen saýda 22 paıyzǵa, Sychýan provıntsııasyna eksport 49 paıyzǵa jáne Tszıansýǵa eksport tórt ese ósti. Qazaqstandyq kompanııalardyń eń iri jáne tanymal kórmelerge qatysýy qamtamasyz etildi, olar: CIFTIS, CIIE, Digital Expo, Eýrazııa EKSPO. Qazaqstandyq taýarlardy ulttyq pavılondar arqyly jd.com, Doiyin, Alibaba halyqaralyq elektrondyq alańdarda ilgeriletý boıynsha jumystar júrgizilip jatyr, - dedi Arman Shaqqalıev.
Buǵan deıin Arman Shaqqalıev saýda mınıstrliginiń basym mindetterin ataǵanyn jazǵan edik.