Otandyq taýarlardy qaralaýǵa baǵyttalǵan aqparattyq naýqan bolyp jatyr - Premer-mınıstr
ASTANA. KAZINFORM – Halyq tutynatyn taýarlardy shyǵaratyn otandyq óndirýshiler kóp jaǵdaıda saýda alańdaryna qol jetkize almaıdy. Bul týraly Úkimet otyrysynda Premer-mınıstr Oljas Bektenov málim etti.
- Saýda mınıstrligine múddeli memlekettik organdarmen jáne «Atameken» palatasymen birlesip, bir aı ishinde «Qazaqstanda jasalǵan» brendimen shyǵarylatyn taýarlardy qoldaý men ilgeriletýdiń keshendi baǵdarlamasyn ázirleýdi tapsyramyn. Sondaı-aq bir aı merzimde halyq arasynda eń kóp suranysqa ıe basym taýar sanattaryn aıqyndaý qajet. Árbir sanat boıynsha ishki naryqtaǵy otandyq ónimniń úlesin arttyrýǵa arnalǵan nysanaly kórsetkishterdi belgileý kerek. Saýda jelilerimen birge otandyq saýda markalaryn damytyp, qazaqstandyq óndirýshilermen uzaq merzimdi jetkizý sharttaryn bekitý qajet, - dedi O.Bektenov.
Onyń aıtýynsha, halyq tutynatyn taýarlardy shyǵaratyn otandyq óndirýshiler kóp jaǵdaıda saýda alańdaryna qol jetkize almaıdy, onyń ishinde jalǵa alý aqysynyń joǵary bolýyna baılanysty qıyndyqtar da bar. Bul ishki naryqta qazaqstandyq ónimniń úlesin keńeıtýge kedergi keltirip, onyń básekege qabilettiligin tómendetedi.
- Saýda jelileriniń ıeleri qazaqstandyq taýarlarǵa degen kózqarasyn túbegeıli ózgertýge tıis dep sanaımyn. Otandyq ónimnen buryn ımporttyq taýarlarǵa basymdyq berý quqyqtyq jaǵynan ǵana emes, moraldyq turǵydan da durys emes. Saýda mınıstrligine múddeli memlekettik organdarmen, óńir ákimdikterimen jáne «Atameken» palatasymen birlesip, taýarlardyń barlyq sanattaryn, onyń ishinde jeńil ónerkásip pen turmystyq hımııa ónimderin shyǵaratyn otandyq óndirýshilerge saýda alańdaryn jalǵa alýdyń qolaıly sharttaryn usynýdyń naqty tetikterin ázirleýdi tapsyramyn, - dedi Premer-mınıstr.
O.Bektenovtiń sózine qaraǵanda, Qazaqstanda óndiriletin tanymal taýarlardy, atap aıtqanda azyq-túlik jáne kondıterlik ónimderdi qaralaý úshin ádeıi uıymdastyrylǵan aqparattyq naýqandar bolyp jatyr. Munyń barlyǵynyń kózdegen maqsaty bir – básekelesterdi naryqtan yǵystyryp, olardyń ornyn ıemdenip qalý.
- Mádenıet jáne aqparat mınıstrligi múddeli memlekettik organdarmen birlesip, «Qazaqstanda jasalǵan» ulttyq brendin ilgeriletýge, otandyq taýarlardy keńinen dáripteýge jáne olardy negizsiz aqparattyq shabýyldardan qorǵaýǵa baǵyttalǵan biryńǵaı aqparattyq naýqannyń júrgizilýin qamtamasyz etsin, - dep tapsyrdy Úkimet basshysy.
Buǵan deıin azyq-túlik boıynsha elde negizgi otandyq ónimder qanshalyqty qamtamasyz etilgenin jazǵan edik.
