Otandyq taýar óndirýshiler reestrdiń prototıpin synaqtan ótkizip jatyr

ASTANA. KAZINFORM – Ónerkásip jáne qurylys mınıstrligi men «Elektrondyq qarjy ortalyǵy» AQ birlesip, otandyq taýar óndirýshiler reestriniń prototıpin synaqtan ótkizdi. 

Bul – memleket pen bıznes arasyndaǵy ózara baılanysty ashyq, jedel ári yńǵaıly ete túsetin tsıfrlyq memlekettik servıs. 

Otandyq taýar óndirýshiler reestri Qazaqstannyń ónerkásiptik tsıfrlyq ekojúıesiniń bir bóligine aınalyp, ulttyq óndirýshiler týraly naqty derekterdiń biryńǵaı kózi retinde qyzmet atqarady. Munda ár kásiporynnyń tsıfrlyq profıli jasalyp, tirkeý derekteri, óndiristik ǵımarattar men jabdyqtar týraly aqparat, lıtsenzııalar men sertıfıkattar, jetkizýshiler men shyǵarylatyn ónim týraly málimetter qamtylady. 

Tirkeýden soń óndirýshiler jeke kabınetterine qol jetkizip, onlaın rejımde otandyq taýar óndirýshi mártebesin rastaýǵa ótinish berip, vıdeo arqyly óndiristik protsessti kórsetip, ETsQ arqyly qujattarǵa qol qoıyp, barlyq protsesti ózi baqylap otyrady. Júıe «ZT MDB», «E-lıtsenzııalaý» jáne basqa da memlekettik derekqorlarmen biriktiriledi. Bul málimetterdiń ózektiligin saqtap, qolmen málimet engizý kólemin azaıtady. 

Testileýge qatysýshylar túrli sala men aımaqtardan shaqyryldy. Atalǵan júıeni iri ónerkásiptik kásiporyndardan bastap shaǵyn tsehtarǵa deıingi óndiristik jaǵdaılarda tekserýge múmkindik berdi. Otandyq taýar óndirýshiler reestri prototıpin synaqtan ótkizýge eldiń 13 óńiriniń kásiporyndar qatysyp jatyr. Olardyń ishinde Astana, Almaty, Shymkent qalalary men Aqmola, Atyraý, Jambyl, Qaraǵandy, Qostanaı, Mańǵystaý, Pavlodar, SQO, Túrkistan jáne Abaı men Ulytaý oblystarynan 19 iri, 6 orta jáne 11 shaǵyn kompanııa bar. Olar mashına jasaý, avtokólik óndirisi, elektrotehnıkalyq jáne elektrondyq ónerkásip, hımııa, toqyma, farmatsevtıka, aǵash óńdeý ónerkásibi men metallýrgııany qamtıdy. Mundaı ártúrlilik júıeniń tehnıkalyq jáne fýnktsıonaldyq múmkindikterin tekserip, ınterfeıs pen servısti jetildirý boıynsha naqty usynystar jınaýǵa múmkindik beredi. 

– Otandyq taýar óndirýshiler reestri – bul jaı ǵana tsıfrlyq derekter bazasy emes, bul memleket pen bıznes arasyndaǵy senim quraly. Biz ondaǵan anyqtamany almastyryp, naqty óndiristik derekterge súıene otyryp qazaqstandyq óndirýshi mártebesin rastaıtyn júıe jasap jatyrmyz. Bul – memlekettik qoldaýdy ashyqári tıimdi etý jolyndaǵy mańyzdy qadam. Qazir óndirýshilerden túrli usynystar túsip jatyr. Bul usynystar reestrdi óndiristik paıdalanýǵa engizbes buryn ony jetildirýge negiz bolady, - dedi Ónerkásip jáne qurylys vıtse-mınıstri Oljas Saparbekov.

Al «Elektrondyq qarjy ortalyǵy» AQ basqarýshy dırektory Aıdos Sydyqov Reestrdi áý bastan túsinikti, logıkalyq jáne vızýaldy túrde jeńil júıe retinde jobalaǵanyn aıtty. 

– Bizdiń maqsatymyz – uzaq nusqaýlyqsyz, jınaqy ári túsinikti júıe jasaý. ıAǵnı, óndirýshi júıege kirdi, ótinimdi qalaı berý kerektigin kórdi, málimetterdi jańartty, qujattardy ońaı tirkedi. Dál qazir kásiporyndardan keri baılanys alyp jatyrmyz. Bul – mańyzdy kezeń, - deıdi ol.

Testileý nátıjesi boıynsha ázirleýshiler barlyq usynystar men eskertýlerdi egjeı-tegjeıli taldaıdy. Sońǵy túzetýlerden soń tsıfrlyq servıs óndiristik paıdalanýǵa engiziledi. Osylaısha óz ónimin rastaı otyryp, el ekonomıkasyn eseleı túsetin adal óndirýshilerdiń ortaq alańyna aınalady.