Otandyq taýar óndirýshiler Qazaqstanda shyǵarylǵan taýarlar tizilimin engizýge qarsy
Saýda jáne ıntegratsııa mınıstrligi Qazaqstanda shyǵarylǵan taýarlar tizilimin engizbek. Alaıda, bul usynysqa elimizdegi qaýymdastyqtar men otandyq taýar óndirýshiler qarsy shyǵyp otyr, dep habarlaıdy QazAqparat tilshisi.
«Bıyl Úkimet Qazaqstanda shyǵarylǵan taýarlar tizilimin qurý máselesin kóterdi. Bul tizilim Indýstrııalyq sertıfıkat pen ST-KZ sertıfıkatyn almastyrýdy kózdeıdi. Ókinishke qaraı, bıznes-qoǵamdastyqtyń osy tizilimdi qurýdyń orynsyzdyǵy týraly barlyq dáleli men negizdemeleri tyńdalmady», – dedi «Atameken» UKP taýardyń shyǵý tegin sertıfıkattaý departamentiniń basqarýshy dırektory Samat Sadyqov.
Qazirgi kezde Ulttyq kásipkerler palatasy otandyq taýar óndirýshilerdi qoldaý maqsatynda retteletin satyp alýdyń negizgi sheńberinde qoldanylatyn qujattardyń eki túrin berý jónindegi fýnktsııany júzege asyrady. Mundaı qujattar – «ST-KZ» formasyndaǵy sertıfıkat pen Indýstrııalyq sertıfıkat. Al memlekettik organ usynǵan tizilimde mehanızm jetilmegen. Óıtkeni onda tizilimge ótýge ruqsat beretin bir ǵana krıterıı – tehnologııalyq operatsııalardy oryndaý ǵana qarastyrylǵan. Alaıda barlyq taýarǵa derlik tehnologııalyq operatsııalardy jazyp shyǵý múmkin emes.
Mysaly, Reseıde osyǵan uqsas tizilim 2015 jyldan qoldanylyp keledi, onyń ústine ónerkásip te anaǵurlym damyǵan. Tizilimge 11,5 myń kodtyń 2 myń kody engizilgen.
«Atameken» ókiliniń atap ótýinshe, memlekettik organdar usynǵan tizimdi jańa mehanızm dep aıtýǵa bolmaıdy. Onyń ST-KZ berý jónindegi qoldanystaǵy mehanızmnen aıyrmashylyǵy, tek bir krıterııdi qoldanylady – bul tehnologııalyq operatsııalar. Al ST-KZ sertıfıkatynda 3 krıterıı qarastyrylǵan.
Sonymen qatar, memlekettik organ usynǵan Qazaqstanda shyǵarylǵan taýarlar tiziliminde óndiristi lokalızatsııalaý deńgeıi men kásiporyndardyń óndiristik qýaty kórsetilmeıdi.
Memlekettik organdar usynǵany – ST-KZ sertıfıkatyn berýge qoıylatyn talaptardyń ózgerýi ǵana. Ol basqa ataýǵa ıe bolady, biraq sonymen birge jańa talaptarǵa kóshý jáne jańa qujat alýǵa baılanysty zańdarǵa ózgeris engizýdi talap etedi, sondaı-aq bıznes úshin qarjylyq jáne ýaqyttyq shyǵyndarǵa ákep soǵady.
QR Jıhaz jáne aǵash óńdeý ónerkásibi qaýymdastyǵynyń prezıdenti Qanat Ibraev atap ótýinshe, búgingi tańda ındýstrııalyq sertıfıkat – bıznestiń naryqta baqylaýdy júzege asyrýǵa jáne naqty óndiristi qoldaý sheńberinde oıynnyń naqty erejelerin jarııalaýǵa múmkindigi bar quraldardyń biri.
«Memlekettik satyp alýǵa qatysatyn óndirýshilerdiń naqty sektory Indýstrııalyq sertıfıkattyń tıimdiligine kózi jetti. Mysal keltirsem, Indýstrııalyq sertıfıkat engizilgenge deıin 2019 jyly jıhaz salasy boıynsha negizgi kapıtalǵa salynǵan ınvestıtsııalar shamamen 1,7 mlrd teńgeni qurasa, Indýstrııalyq sertıfıkat engizilgennen keıin 21,1 paıyzǵa ósip, 2,1 mlrd teńgeden asty», – dedi Qanat Ibraev.
