Otandyq tasymaldaýshylarǵa 58 eldiń naryǵyna shyǵýǵa jol ashylady — Quryltaı zań qabyldady
ASTANA. KAZINFORM — Búgin Quryltaı otyrysynda «Júkterdi halyqaralyq jolmen tasymaldaý sharty týraly konventsııany ratıfıkatsııalaý týraly» zań jobasy birinshi oqylymda maquldanyp, ekinshi oqylymda qabyldandy.
Otandyq júk tasymaldaýshylar 58 elge ortaq erejege kóshedi
Qujatty tanystyrǵan Kólik mınıstriniń mindetin atqarýshy Maqsat Qalıaqparovtyń aıtýynsha, konventsııa halyqaralyq avtotasymaldar salasyndaǵy negizgi qujat sanalady. Oǵan 58 memleket kiredi, onyń ishinde TMD-nyń barlyq eli de bar.
— Bul qujat halyqaralyq avtomobıl júk jetkizý tártibin belgileıdi. Atap aıtqanda shart jasaý, rásimdeý jáne tasymaldaýshynyń jaýapkershiligi týraly ortaq talaptardy qamtıdy. Atalǵan konventsııa qatysýshy memleketterdiń tasymaldaýshylaryna biryńǵaı talaptardy qoldaný, halyqaralyq kólik qyzmetteri naryǵynda ashyq básekelestik qalyptastyrýǵa yqpal etedi. Sonymen qatar tasymaldaý protsesine qatysýshylardyń quqyqtaryn qorǵaýǵa jáne halyqaralyq júk jetkizýdi jeńildetedi, — dedi ol.
Onyń sózine qaraǵanda, konventsııany qoldaný eksporttyq-ımporttyq júk aınalymynyń damýyna yqpal etip, sheteldik memleketter qazaqstandyq kompanııalarǵa senimin arttyrady. Sondyqtan osy qujatty qabyldaý otandyq kólik kompanııalarynyń halyqaralyq naryqtarǵa shyǵý jáne júk jetkizý geografııasyn keńeıtý úshin qolaıly jaǵdaı jasaıdy.
— Memleket basshysy aıtqandaı, avtokólikpen júk tasymaldaıtyn otandyq kásipkerlerimizge járdem kórsetý qajet. Osyǵan oraı, usynylǵan konventsııa kórsetilgen maqsattarǵa qol jetkizýge múmkindik beredi. Atalǵan zań jobasy respýblıkalyq bıýdjetten qosymsha qarajat bólýdi talap etpeıdi, — dedi Maqsat Qalıaqparov.
Júk tasymaldaýshylarǵa arnaıy baǵdarlama ázirlenedi
Osydan keıin depýtattar baıandamashyǵa suraqtaryn qoıdy. Máselen, Janarbek Áshimjan Qazaqstannyń halyqaralyq avtomobılmen júk tasymaldaý kelisimsharty týraly konventsııaǵa qosylýy nátıjesinde elde halyqaralyq avtomobıl tasymaldarynyń quqyqtyq negizi qalanatynyn atap ótti.
— Osy konventsııaǵa qatysýshy elder arasyndaǵy tranzıttik-kóliktik qatynastar odan ári damıdy. Tasymaldaýshylardyń jaýapkershiligi standarttalady, kedendik rásimder ońtaılandyrylady, sondaı-aq eýrazııalyq logıstıkalyq júıege ıntegratsııalaný qamtamasyz etiledi. Osyǵan baılanysty meniń suraǵym: atalǵan konventsııa qazaqstandyq tasymaldaýshylarǵa qandaı qosymsha múmkindikter beredi? — dep surady ol baıandamashydan.
Saýalǵa jaýap bergen mınıstr mindetin atqarýshy elimiz konventsııaǵa qosylǵannan keıin 58 elde qoldanylatyn biryńǵaı erejelermen jumys isteıtinin aıtty.
— Demek, bul otandyq tasymaldaýshylarǵa oń áserin tıgizedi. Óıtkeni biryńǵaı erejelermen júredi, biryńǵaı júıe bolady, — dedi ol.
Al depýtat Konstantın Avershın halyqaralyq naryqta otandyq tasymaldaýshylardyń básekege qabilettiligin arttyrý ashyq ári birizdendirilgen quqyqtyq jaǵdaı qalyptastyrmaı múmkin emestigine nazar aýdartty. Osyǵan oraı ol konventsııaǵa qosylý jáne quqyqtyq ózgerister engizý qazaqstandyq tasymaldaýshylardyń básekege qabilettiligin arttyrýǵa qanshalyqty jetkilikti bolatynyna alańdaýshylyq tanytty.
Maqsat Qalıaqparovtyń paıymynsha, elimizdiń konventsııaǵa qosylýy otandyq tasymaldaýshylardyń básekege qabilettiligin arttyrýdaǵy mańyzdy qadam bolmaq.
— Qazir biz olarǵa arnap osy konventsııanyń usynymdary men usynystary aıasynda arnaıy baǵdarlama ázirlep jatyrmyz. Jalpy, bul konventsııa halyqaralyq tasymaldardy júzege asyratyn qazaqstandyq tasymaldaýshylardyń básekege qabilettiligin sózsiz arttyrady dep esepteımin, — dedi mınıstr mindetin atqarýshy.
Qazaqstannyń tranzıttik áleýetin arttyrýǵa jańa múmkindik týady
Zań jobasyn talqylaý barysynda depýtat Turarbek Tilemisov halyqaralyq avtomobıl tasymaldarynyń quqyqtyq alańyn jetildirý máselesi elimizdiń ekonomıkalyq egemendigi men eksporttyq áleýeti úshin asa mańyzdy ekenine toqtaldy.
— Konventsııa — bul jaı ǵana kólik júk qozǵaıtyn standarttary emes, bul órkenıetti logıstıka naryǵynyń irgetasy. Nelikten bul baǵytta qoldaý men damytý túbegeıli mańyzdy? Birinshiden — bıznestiń quqyqtyq qorǵalýy. Bizdiń otandyq tasymaldaýshylar kún saıyn halyqaralyq baǵyttarǵa shyǵady. Biryńǵaı jáne túsinikti erejeler bolmaǵan jaǵdaıda, olar kóbinese júkterdiń búlinýi, joǵalýy nemese jolda keshigý kezinde týyndaıtyn daýlarda qorǵansyz qalady. Osy konventsııa jaýapkershilik lımıtterin jáne shaǵymdardy retteýdiń ashyq tetikterin naqty bekitip, qazaqstandyq bıznestiń múddelerin qorǵaıdy, — dedi ol.
Depýtat zań jobasy ekinshiden elimizdiń tranzıttik áleýetin arttyratynyn aıtty.
— Qazaqstan geografııalyq turǵydan Azııa men Eýropa arasyndaǵy basty kópir bolý úshin jaralǵan. Sheteldik ınvestorlar men iri logıstıkalyq operatorlar jalpyǵa birdeı tanylǵan halyqaralyq konventsııalardy qoldana alatyn dálizderge ǵana senim artady. Bul kólik ınfraqurylymyna ınvestıtsııalardy tartýǵa tikeleı áser etedi. Osy bastamany qabyldaý jáne belsendi túrde qoldaý memleketimizdiń senimdi ári boljamdy saýda seriktes retinde ustanymyn nyǵaıta túsedi, — dedi Turarbek Tilemisov.
Osydan keıin Óńirlik jáne ınfraqurylymdyq damý komıtetiniń usynysymen zań jobasy birinshi oqylymda maquldanyp, ekinshi oqylymda qabyldandy. Qujat komıtet otyrystarynda depýtattarmen jáne múddeli memlekettik organdar ókilderimen jan-jaqty qaralǵan ári usynystar men eskertpeler kelip túspegen. Zań jobasy kólik-logıstıkalyq protsestiń negizgi qatysýshylary — jóneltýshiler, alýshylar men tasymaldaýshylardyń ózara is-qımylyn retteýge baǵyttalǵan. Sonymen qatar halyqaralyq avtomobıl júk tasymalynyń júzege asýy kezinde olardyń arasynda týyndaıtyn quqyqtyq qatynastardy retteıdi.
Buǵan deıin Qazaqstan men Ázerbaıjan Kaspıı arqyly júk tasymaldaýdyń jańa júıesin iske qosatynyn jazǵanbyz.
