Otandyq sportshylar halyqaralyq jarystarda 200 medal jeńip aldy
ASTANA. KAZINFORM — Bıyl І toqsannyń qorytyndysy boıynsha otandyq sportshylar halyqaralyq arenada joǵary nátıjeler kórsetti. Jerlesterimiz jazǵy olımpıadalyq jáne olımpıadalyq emes sport túrlerinde jalpy 138 medal oljalady. Onyń ishinde 51-i altyn, 39-y kúmis jáne 48-i qola. Bul týraly Týrızm jáne sport mınıstrligi málim etti.
Ulttyq sport túrlerinen otandyq sportshylar 22 medal ıelendi. Onyń ishinde 9-y altyn, 6-ýy kúmis jáne 7-eýi qola.
— Para sportshylar da tabysty óner kórsetti. Birinshi toqsanda olar jalpy 34 medal (15 altyn, 10 kúmis jáne 9 qola) jeńip aldy. Atap aıtqanda, paralımpıadalyq sport túrlerinen 24 medal (7 altyn, 8 kúmis, 9 qola) oljalasa, paralımpıadalyq emes baǵyttarda 10 medal (8 altyn, 2 kúmis) enshiledi, — delingen habarlamada.
Qysqy sport túrlerinde de sportshylarymyz 6 medal (4 altyn jáne 2 kúmis) jeńip aldy. Osylaısha, 2026 jyldyń І toqsanynda Qazaqstan quramasy jalpy 200 medal (79 altyn, 57 kúmis jáne 64 qola) oljalady.
Sonymen qatar alǵashqy toqsanda otandastarymyz birqatar mańyzdy jetistikterge qol jetkizdi. Atap aıtqanda, velotrekten Qazaqstannyń jasóspirim qyzdar quramasy Fılıppınniń Tagaıtaı qalasynda ótken Azııa chempıonatynda komandalyq iz kesý jarysynda tarıhı altyn medal jeńip aldy.
Sondaı-aq Shveıtsarııanyń Aırolo qalasynda ótken frıstaıl-akrobatıkadan jasóspirimder arasyndaǵy álem chempıonatynda Asan Asylhan fınalda 103,35 upaı jınap, altyn medal ıelendi. Al Dinmuhammed Raıymqulov 92,82 upaımen kúmis júldeger atandy. Budan bólek, Ázerbaıjannyń Baký qalasynda ótken sporttyq gımnastıkadan Álem kýbogi kezeńinde Mılad Karımı eki kúmis medal jeńip aldy.
Sondaı-aq konkıshi Krıstına Shýmekova aıryqsha nátıje kórsetip, jasóspirimder arasynda álemniń absolıýtti chempıony atanyp, bes altyn medal jeńip aldy. Bul — otandyq sport tarıhyndaǵy mańyzdy jetistik.
Týrızm jáne sport mınıstrligi joǵary jetistikter sportyn damytý jáne ulttyq quramalardy aldaǵy halyqaralyq jarystarǵa daıyndaý baǵytyndaǵy júıeli jumysty jalǵastyrady.
Aıta keteıik, Mahmud Sabyrhan Azııa chempıonatynyń qola júldegeri atandy.
