Tájikstan qazaqstandyqtarǵa 100 bilim grantyn bóldi

ASTANA. KAZINFORM – Qazaqstan men Tájikstan úkimetteri arasyndaǵy bilim berý salasyndaǵy yntymaqtastyq týraly kelisim aıasynda 2025–2026 oqý jylyna qazaqstandyq talapkerlerge Tájikstan Respýblıkasynyń joǵary oqý oryndarynda oqý úshin 100 bilim granty bólindi. Bul týraly «Halyqaralyq baǵdarlamalar ortalyǵy» AQ habarlady.

Granttar mynadaı baǵdarlamalar boıynsha usynylady:

– bakalavrıat – 70 oryn;
– magıstratýra – 20 oryn;
– úzdiksiz ıntegratsııalanǵan medıtsınalyq bilim berý baǵdarlamasy – 10 oryn.

Oqytý tili – tájik jáne orys tilderi.

Grant kelesi shyǵyndardy qamtıdy:

– tegin oqý;
– aı saıynǵy stıpendııa;
– medıtsınalyq qyzmet kórsetý.

Qalǵan shyǵyndar, onyń ishinde jolaqy men jataqhana aqysy, grant ıegeriniń esebinen tólenedi.

Qujattardyń tolyq toptamasyn qabyldaý 2025 jylǵy 10 shildeden 5 tamyzǵa deıin júrgiziledi.

Aıta keteıik, buǵan deıin Grýzııanyń qazaqstandyqtarǵa bilim grantyn bólgeni habarlanǵan.