Otandyq saýda: Oljas Bektenov mınıstrlerge birneshe mindet júktedi
ASTANA. KAZINFORM — Úkimet basshysy Oljas Bektenov taýar óndirý, satý jáne topqa bólý boıynsha quzyrly organdarǵa tapsyrma berdi.
— Birinshiden, Saýda jáne ıntegratsııa mınıstrligi men Qarjy mınıstrligi múddeli memlekettik organdarmen birlesip, bıyl 1 qazanǵa qaraı taýar, jumys pen kórsetiletin qyzmet júıesinde taýarlardy topqa bólýdi aıaqtasyn. Ekinshiden, vedomstvolyq aqparattyq júıeniń taýarlardyń ulttyq katalogimen sapaly ıntegratsııasyn qamtamasyz etý úshin normatıvtik quqyqtyq aktilerge taldaý júrgizip, olardy jańartý qajet, — dedi Oljas Bektenov Úkimet otyrysynda.
Osy oraıda Premer-mınıstr Qarjy mınıstrligine múddeli memlekettik organdarmen birlesip, tıisti jumys júrgizýdi tapsyrdy.
— Úshinshiden, áleýmettik mańyzy bar azyq-túlikke belgilenetin saýda ústemesin baqylaýdy kúsheıtý maqsatynda Saýda jáne ıntegratsııa mınıstrligi bıyl 1 qazanǵa deıin Kókshetaý jáne Pavlodar qalasynda tsıfrlyq azyq-túlik vaýcheri pılottyq jobasyn iske qosýdy tapsyramyn, — deıdi ol.
Joǵaryda atalǵan tapsyrmalardy úılestirý men baqylaý vıtse-premer Serik Jumanǵarınge júkteldi.
Buǵan deıin Oljas Bektenov taýardy tańbalaýdyń mańyzdylyǵyn kásipkerlerge túsindirý jumysy júrgizilmeı jatqanyn aıtqan edi.
Sondaı-aq Úkimet basshysy Oljas Bektenov taýarlardy óndirýdiń barlyq protsesin baqylaıtyn ulttyq katalog engizý jumysyn jedeldetýdi tapsyrdy.