Otandyq irimshiktiń sapasy ımporttan kem emes — Aıdarbek Saparov

ASTANA. KAZINFORM — QR Aýyl sharýashylyǵy mınıstri Aıdarbek Saparov Úkimet otyrysynan keıingi brıfıngte otandyq irimshiktiń sapasy men óndirisi týraly pikir bildirdi.

Mınıstrdiń aıtýynsha, eldegi satylymdaǵy irimshiktiń 58%-y otandyq óndiris, ıaǵnı ishki suranystyń jartysynan kóbi óz ónimimizben qamtamasyz etilip otyr. Al aldaǵy maqsat — bul kórsetkishti 80%-ǵa jetkizý, bul ımportqa táýeldilikti aıtarlyqtaı azaıtady.

— Adamdar dámi men baǵasyna qaraı tańdaıdy. Biraq sapa jaǵynan bizdiń irimshik sheteldik ónimnen esh kem emes, — dedi Aıdarbek Saparov.

Mınıstr baǵa máselesine de toqtaldy.

— Ónimniń baǵasy dúken men taýar jelisine baılanysty ózgeredi. Óndiris kezinde baǵa tómen bolýy múmkin, biraq deldaldar men saýda ústemesi áser etedi. Jalpy saýda ústemesi 15%-dan aspaýy tıis, — dedi ol.

Aıdarbek Saparov otandyq irimshiktiń sapasyn arttyrý jáne baǵasyn básekege qabiletti etý úshin sharalar jalǵasyp jatqanyn atap ótti.

Buǵan deıin mınıstr sıyr eti eksportyna qoıylǵan shekteýdiń jeńildeýi múmkin ekenin aıtqan edi.