Otandyq irimshik óndirýshiler Frantsııadada ótken baıqaýda top jardy
ASTANA. KAZINFORM — Qazaqstandyq fermerler men aýyl sharýashylyǵy ónimderin óndirýshiler Frantsııanyń Týr qalasynda ótken álemdik syr baıqaýy Le Mondial du Fromage bedeldi marapattarǵa ıe bolyp, jahandyq qoǵamdastyqtyń nazaryn ózderine aýdardy. Bul týraly AShM málim etti.
«Bir aýyl – bir ónim» bastamasy tabysty túrde júzege asyp kele jatqanyna on jylǵa jýyq ýaqyt boldy. Bul joly da ol óziniń tıimdiligin halyqaralyq deńgeıde dáleldedi.
Álemdegi eń bedeldi syr óndirýshiler baıqaýlarynyń birinde qazaqstandyq qatysýshylar 32 elden kelgen úmitkerlermen baq synap, úsh altyn, bir kúmis jáne eki qola medalǵa qol jetkizdi. Altyn medaldardyń birin kókshetaýlyq bes balanyń anasy Elvıra Muqasheva ıelendi. Elvıra úı jaǵdaıynda tabıǵı ıogýrt, aıran jáne irimshik óndirýden bastaǵan. Ýaqyt óte kele hobbı kásibı iske aınalyp, ol kúnine 100 lıtrge deıin sút óńdedi. Keıinirek memlekettik granttarǵa ıe boldy — áýeli 1,4 mln teńge, odan keıin 5 mln teńge. Bul qarajat tońazytqysh jabdyǵyn, separator men kásibı irimshik qaınatatyn qazan satyp alýǵa jumsaldy.
— Qazaqstandy álemdik deńgeıde tanyta alǵanyma maqtanamyn. Bizdiń elimizdiń áleýeti zor, ásirese agrosektorda, — dep bólisti kásipker.
Ekinshi altyn medalǵa Mańǵystaýdan shyqqan «Jeti laq» fermasynyń negizin qalaýshylar ıe boldy. Kobzevter áýletiniń fermasynda pasterlengen eshki súti, ıogýrt, aıran, qaımaq, súzbe jáne 12 túrli irimshik óndiriledi. Aı saıyn munda 3,5 tonnaǵa deıin eshki súti óńdeledi.
— Biz memlekettik granttyq baǵdarlamalarǵa jáne «Aýyl amanaty» sııaqty bastamalarǵa belsendi qatysamyz. Memlekettik qoldaýsyz aýyldaǵy agrobıznesti damytý óte qıyn bolar edi. Qazaqstannyń halyqaralyq syr arenasyndaǵy jeńisi – bárimizdiń ortaq maqtanyshymyz, — dedi ferma ókili Aleksandr Grıgolov.
Úshinshi altyn medalǵa Býrabaı aýdany Qatarkól aýylynyń turǵyny Rýslan Sokolov óziniń avtorlyq «Býra» irimshigimen qol jetkizdi.
— Le Mondial du Fromage maǵan erekshe shabyt syılady. Baıqaýǵa qatysý jáne álemniń túkpir-túkpirinen kelgen irimshik óndirýshilerimen tájirıbe almasý – baǵa jetpes múmkindik. Altyn medal – bul tek qýanysh emes, sonymen birge úlken jaýapkershilik, — dep atap ótti Sokolov.
Qazaqstandyq irimshikshilerdiń jetistigi aýyl sharýashylyǵyn qoldaý, ulttyq ónimderdi nasıhattaý, aýyl kásipkerlerin yntalandyrý jáne agrarlyq ekonomıkany damytý baǵytyndaǵy keshendi memlekettik saıasattyń tıimdiligin aıqyn kórsetti.
Aıta keteıik, aty ańyzǵa aınalǵan aport sorty qaıta ósirile bastady.