Otandyq para tennısshiler álemdik reıtıngtiń úzdik 100 sportshysynyń qataryna endi
ASTANA. KAZINFORM — Qazaqstandyq para tennısshiler World Tennis álemdik reıtınginde tarıhı nátıjelerge qol jetkizdi. Bul týraly Qazaqstan tennıs federatsııasy habarlady.
Reıtıngtik upaılary boıynsha WC175 sanatyndaǵy týrnırlerge teńestirilgen Azııa oıyndarynyń qorytyndysy boıynsha qazaqstandyq sportshylar World Tennis álemdik reıtıngindegi oryndaryn jaqsartty.
Atap aıtqanda:
- Evgenıı Bykov (Quad) reıtıngte 16 satyǵa kóterilip, jekeleı synda 73-orynǵa, al juptyq synda 74-orynǵa turaqtady.
- Aıjan Bútimbaeva jekeleı synda 93-oryndy, al juptyq synda 76-oryndy ıelenip otyr.
- Erdaýlet Qadymbergenov jekeleı synda birden 67 satyǵa joǵarylap, 145-orynǵa kóterildi. Al juptyq synda 210-orynda tur.
- Janat Úmitqulova juptyq synda World Tennis álemdik reıtınginiń úzdik 100 sportshysynyń qataryna endi.
- Evgenıı Bykov pen Erdaýlet Qadymbergenov Quad jáne erler sanattarynda Qazaqstan para tennısi tarıhyndaǵy eń joǵary reıtıngtik kórsetkishterge qol jetkizdi.
Sonymen qatar, Janat Úmitqulova, Aıjan Bútimbaeva jáne Evgenıı Bykov «Halyqaralyq dárejedegi sport sheberi» ataǵyn alý úshin qajetti normatıvterdi oryndady.
Buǵan deıin Jibek Qulambaeva Úndistandaǵy týrnırde japonııalyq tennısshini ekinshi ret jeńgenin jazǵanbyz.
