Otandyq opera ánshisi ataqty tenormen birge óner kórsetti

ASTANA. KAZINFORM — 2025 jyldyń 27–28 maýsymynda Pompeıdegi amfıteatrda ataqty tenor Andrea Bochellıdiń kontserti ótti, dep habarlaıdy Mádenıet jáne aqparat mınıstrliginiń baspasóz qyzmeti.

Kontsert «Andrea Bocelli Live in Concert» atty gastroldik týr aıasynda uıymdastyryldy.

Andrea Bochellıdiń kontsertterinde dástúrli túrde álemge áıgili ártister óner kórsetedi.

— Italııalyq maestro osy joly Qazaqstannyń opera ánshisi Áıgerim Altynbekpen bir sahnaǵa shyǵyp, dýet oryndady. Bul kesh kórermenge erekshe áser syılady. Ónersúıer qaýym úshin umytylmas oqıǵa boldy, — delingen mınıstrlik habarlamasynda.

Aıta keteıik, 25 maýsymda Áıgerim Altynbek Astanada álemge tanymal tenor Hose Karreraspen de bir sahnada óner kórsetken edi. Ónerpazdardyń kásibı sheberligi men zor daýysy sol keshte de kórermendi beı-jaı qaldyrmady.

Buǵan deıin qazaqstandyq opera ánshisi Áıgerim Altynbek álemdegi eń bedeldi opera óneri oqý oryndarynyń biri — «La Skala» teatry akademııasynda taǵylymdamadan ótetini aıtyldy.

Sonymen qatar Áıgerim Altynbek Jibek Joly arnasynyń «Búgin LIVE» stýdııasyna qonaq boldy.

Ol naqty bir opera ánshisin «kýmırim» dep aıta almaıtynyn atap ótti.