Ónimdi eksporttaý máselesinde eginshilerge qoldaý kórsetilmek

ASTANA. KAZINFORM – Otandyq aýyl sharýashylyǵy ónimderin básekege qabiletti etý úshin ony qaıta óńdeý deńgeıin arttyrý qajet. Bul týraly Premer-Mınıstr Oljas Bektenov Úkimet otyrysynda aıtty.

Premerdiń aıtýynsha, 2027 jylǵa deıin agrosektorda jalpy quny shamamen 2,3 trln teńge bolatyn 700-den astam jobany iske asyrý josparlanǵan.

«Bul Prezıdenttiń qaıta óńdelgen ónim úlesin 70%-ǵa deıin jetkizý tapsyrmasyn oryndaýǵa múmkindik beredi. Aýyl sharýashylyǵy mınıstrligi men óńir ákimderi osy jobalardyń barlyǵyn qatań baqylaýda ustap, tolyq óndiristik qýatyna shyqqansha súıemeldep otyrýǵa tıis», - dedi O. Bektenov.

Úkimet basshysy ónimdi eksporttaý máselesinde eginshilerge qoldaý kórsetý mańyzdy ekenin atap ótti.

«Agroónimdi saqtaý ınfraqurylymyn damytý jumystaryn da kúsheıtý qajet. Qazaqstandyq ónimdi jetkizý geografııasynyń keńeıip jatqanyn eskere otyryp, jańa kólik-logıstıkalyq baǵyttardy pysyqtaý kerek. Aýyl sharýashylyǵy, Kólik, Saýda mınıstrlikterine aýyl sharýashylyǵynyń eksporttyq áleýetin nyǵaıtý boıynsha sharalar keshenin ázirleýdi tapsyramyn», - dedi ol.

Eske sala keteıik, 2025 jylǵy kóktemgi egis jáne egin jınaý jumystaryn qarjylandyrý kólemin 100 mlrd teńgege jetkizý josparlanýda. 2025 jylǵy kóktemgi egis jáne egin jınaý jumystary erterek qarjylandyrady.

Sondaı-aq, birinshi kezekte shaǵyn qojalyqtardan astyq satyp alynady.