Otandyq ónim: ımportqa táýeldilik qanshalyqty tómendedi
ASTANA. KAZINFORM – Jarty jylda ishki taýar aınalymynyń kólemi 36,2 trln teńgeni qurady. Bul týraly Úkimet otyrysynda Saýda jáne ıntegratsııa mınıstri Arman Shaqqalıev málim etti.
- Birinshi jarty jyldyń qorytyndysy boıynsha ishki taýar aınalymynyń kólemi 36,2 trln teńgeni qurap, 15,3 paıyzǵa ósti. Negizgi ósim azyq-túlik segmenti esebinen qamtamasyz etildi. Onyń ósimi shamamen 30 paıyzdy qurady. Otandyq agroónerkásip óndirýshileriniń syrtqy naryqtaǵy ustanymdary da nyǵaıýda. Qańtar–mamyr aılarynyń qorytyndysy boıynsha azyq-túlik eksporty 34,4 paıyzǵa ósip, 1,6 mlrd AQSh dollaryn qurady, - dedi A. Shaqqalıev.
Onyń aıtýynsha, ımportqa táýeldilik tómendedi. Onyń úlesi 14,7 paıyzǵa deıin qysqardy.
- Búginde Qazaqstan eń qajetti ónimdermen ishki suranysty qamtamasyz etedi. Kúnbaǵys maıy, un, kúrish, kartop, pııaz, sábiz, makaron ónimderi, sıyr jáne qoı eti boıynsha 100 paıyz qamtylǵan, - dedi mınıstr.
Aıta keteıik, Qazaqstanda shilde aıynyń qorytyndysy boıynsha áleýmettik mańyzy bar azyq-túlik taýarlarynyń baǵasy 0,3%-ǵa tómendedi.
