Otandyq ónim eksportyn 195 pozıtsııa boıynsha arttyrýǵa daıynbyz – Jumanǵarın
ASTANA. KAZINFORM – Premer-mınıstrdiń orynbasary – ulttyq ekonomıka mınıstri Serik Jumanǵarın Qyrǵyz Respýblıkasynyń Mınıstrler kabıneti tóraǵasynyń orynbasary – sý resýrstary, aýyl sharýashylyǵy jáne qaıta óńdeý ónerkásibi mınıstri Baqyt Torobaevpen kezdesti.
Taraptar ekijaqty saýda-ekonomıkalyq yntymaqtastyqty damytýdyń oń dınamıkasyn sóz etti. Atap aıtqanda, byltyrǵy qorytyndy boıynsha ózara saýda kórsetkishi $1,7 mlrd-ty quraǵan.
Serik Jumanǵarın ekonomıkalyq yntymaqtastyq áleýetin edáýir arttyrý úshin birqatar tıimdi qadam jasaýdy usyndy. Eń aldymen, jetkiziletin taýarlardyń nomenklatýrasyn keńeıtý qajet ekenin aıtty.
– Qazaqstandyq ónim eksportyn 195 pozıtsııa boıynsha $260 mln-nan astam somaǵa arttyrýǵa daıynbyz, - dedi vıtse-premer.
Sondaı-aq ol bıznes-forýmdar men ózara saýda mıssııalaryn ótkizýde ózara saýdany arttyrýdyń mańyzdy rólin atap ótti.
Qatysýshylar aýyl sharýashylyǵyndaǵy yntymaqtastyqty jandandyrýdy talqylady. Atap aıtqanda, Qyrǵyzstannyń erte jemis-jıdekter men kókónis ónimderin Qazaqstan naryǵyna jetkizý máselesi sóz boldy. Óz kezeginde qazaqstandyq tarap dándi jáne maıly daqyl eksportyn arttyrýdy usyndy. Sonymen qatar qatysýshylar temirjol tasymaly rásimderin jeńildetý múmkindigi men birlesken yntymaqtastyqtyń basqa da máselelerin talqyǵa saldy.