Otandyq ónim 15-ten astam memleketke eksporttalyp jatyr
ASTANA.KAZINFORM - Qazaqstan jańa naryqtarǵa jol ashyp, jetkiziletin taýarlar túrin keńeıtip jatyr. Búginde otandyq ónim EAEO, Eýropalyq odaq, TMD elderi, Qytaı, Japonııa, Ońtústik Koreıa, Mońǵolııa, Saýd Arabııasy, BAÁ, Iran, Ázerbaıjan jáne Ózbekstandy qosa alǵanda 15-ten astam memleketke eksporttalady.
Qytaımen qus eti men ІQM terilerin jetkizý jóninde jańa hattamalarǵa qol qoıyldy. Sondaı-aq jylqy eti, bıe súti untaǵy, salqyndatylǵan sıyr eti, qoı eti, shoshqa eti jáne termııalyq óńdelgen ónim eksportynyń aıasyn keńeıtý boıynsha kelissózder júrgizilip jatyr.
QR Aýyl sharýashylyǵy mınıstrligi málimetinshe, Qazaqstan sonymen qatar Eýropalyq odaqqa bal eksporttaıtyn elder tizimine engizildi. Azııa memleketterimen saýda baılanysy nyǵaıyp jatyr. Japonııamen tiri jylqy jáne sút ónimderin jetkizý máselesi talqylanyp jatyr, al Ońtústik Koreıamen – balmuzdaq eksporty.
Malaızııa, Vetnam, Sıngapýr, Katar jáne óńirdiń basqa da elderimen kelissózder jalǵasyp jatyr. Sheteldik elderdiń tizimine 3 652 qazaqstandyq kásiporyn engizilgen, olardyń ishinde tek maýsym aıynda 9 jańa eksporttaýshy tirkeldi.
EAEO elderiniń tizilimderinde mal sharýashylyǵy salasyndaǵy 3 292 kásiporyn bar. QHR naryǵyna qoljetimdilikti keńeıtý maqsatynda QR AShM Veterınarııalyq baqylaý jáne qadaǵalaý komıteti men QHR Bas keden basqarmasy arasynda eksport sharttaryn aıqyndaıtyn 12 hattamaǵa qol qoıyldy.
Birqatar el buryn qoldanysta bolǵan sanıtarııalyq shekteýlerdi alyp tastady. Atap aıtqanda, Belarýs, Reseı jáne Qytaı Qazaqstannyń ońtústik-shyǵys óńirlerinen ónim ákelýge qatysty aýsylǵa baılanysty engizilgen tyıymdardy joıdy.
Túrkııa aýsyl, qus tumaýy jáne nodýlıarly dermatıtke qatysty barlyq shekteýdi alyp tastady. Qytaı da qus tumaýyna qatysty shekteýdi joıdy, al Armenııa aýsylǵa baılanysty barlyq tyıymdy alyp tastady.
Shyǵys Qazaqstan oblysynda QR–QHR biryńǵaı agrolaboratorııasy ashylýǵa daıyndalyp jatyr. Ol qazaqstandyq ónimdi qytaı veterınarııalyq standarttary boıynsha sertıfıkattap, Qytaı naryǵyna qoljetimdilikti jeńildetedi.
Qazaqstan sondaı-aq EAEO aıasynda veterınarııa salasyndaǵy biryńǵaı erejelerdi ázirleýge qatysyp jatyr. Oǵan ónimniń qadaǵalaný júıesi, afrıkalyq shoshqa obasynyń aldyn alý jáne sanıtarııalyq talaptardy buzǵany úshin jaýapkershilik máseleleri kiredi.
Bıyl 7 aıda Qazaqstan qansha kómir eksporttaǵanyn jazǵan bolatynbyz.