Otandyq ónerpaz «La Skala» teatry akademııasynda taǵylymdamadan ótedi
ASTANA. KAZINFORM — Qazaqstandyq opera ánshisi Áıgerim Altynbek álemdegi eń bedeldi opera óneri oqý oryndarynyń biri — «La Skala» teatry akademııasynda taǵylymdamadan ótedi, dep habarlaıdy Mádenıet jáne aqparat mınıstrliginiń baspasóz qyzmeti.
Beınejazba arqyly ótken aldyn ala irikteýge 400-den astam úmitker qatysqan. Olardyń ishinen 12 úzdik oryndaýshy tańdalyp alyndy. Solardyń qatarynda Qazaqstannyń atynan qatysqan Áıgerim Altynbek te bar.
Opera ánshisi Áıgerim Altynbek — kóptegen halyqaralyq vokaldyq baıqaýlardyń laýreaty. Ol tanymal kompozıtor Djakomo Pýchchınıdiń 100 jyldyǵyna oraı uıymdastyrylǵan halyqaralyq opera ánshileri baıqaýynda jeńimpaz atandy. Sonymen qatar Italııanyń Modena qalasynda ótken Nıkolaı Gıaýrov atyndaǵy opera ánshileriniń halyqaralyq baıqaýynda úshinshi oryndy ıelendi. Qazaqstandyq ánshi ataqty ıtalııalyq opera ánshisi Mırella Frenıdiń arnaıy syılyǵyn aldy.
— Álemniń 470 qatysýshysy qatysqan Renata Tebaldı atyndaǵy halyqaralyq vokal konkýrsynda ónerpaz ekinshi orynǵa ıe boldy. 25 maýsymda álemge áıgili Hose Karrerastyń kontserti ótedi. Osy keshte Áıgerim Altynbek te boı kórsetedi. Kontsertte álemdik opera arııalar shyrqalyp, tanymal dýetter óner kórsetedi. 27–28 maýsymynda Italııanyń Neapol qalasynda Andrea Bochellıdiń mereıtoılyq kontsertine qatysyp, aty ańyzǵa aınalǵan tenormen bir sahnada án shyrqaıdy. Bul jetistik — onyń bilimge degen umtylysy men kásibı sheberliginiń jemisi. Sonymen qatar QR Mádenıet jáne aqparat mınıstrliginiń jas talanttardy qoldaýǵa baǵyttalǵan aýqymdy jumystyń nátıjesi, — delingen vedomstvo habarlamasynda.
Buǵan deıin Lıtvada Qazaqstan tarıhy men mádenıetine qatysty derekter tabylǵanyn jazǵan edik.