Otandyq óndirýshilermen jasalǵan kelisimshart kólemi 456 mlrd teńgege jetti - Oljas Saparbekov
ASTANA. KAZINFORM - Qazaqstanda otandyq taýar óndirýshilermen jasalǵan kelisimsharttyń jalpy kólemi 456 mlrd teńgege jetip, 2024 jylmen salystyrǵanda 16% ósti. Bul týraly Májiliste ótken jıynda Ónerkásip jáne qurylys vıtse-mınıstri Oljas Saparbekov málimdedi.
Vıtse-mınıstrdiń aıtýynsha, 2024 jyldyń naýryzynda Úkimet jeńil ónerkásip, mashına jasaý, jıhaz, metallýrgııa, hımııa, qaǵaz jáne qurylys salalary boıynsha 4834-ten astam taýar pozıtsııasyn bekitti.
Bul taýarlar memlekettik satyp alý kezinde ulttyq rejımnen alyp tastaý tizimine engizilgen.
- Eger tizimge engen taýarlardy satyp alý týraly konkýrs jarııalansa, ol eń aldymen qazaqstandyq taýar óndirýshiler arasynda ótkiziledi. Búgingi tańda 2024 jylmen salystyrǵanda otandyq óndirýshilermen jasalǵan sharttar sany 16%-ǵa artyp, 456 mlrd teńge boldy, - dedi vıtse-mınıstr.
Sonymen qatar ol Úkimet otandyq óndiristi odan ary qoldaý jáne qazaqstandyq kompanııalardyń memlekettik satyp alýǵa qatysýyn keńeıtý maqsatynda ulttyq rejımnen alyp tastaý sharalarynyń merzimin uzartý boıynsha jumys júrgizip jatqanyn atap ótti.
Aıta keteıik, bıyl jer qoınaýyn paıdalanýshylarmen 17 kelisimshart buzylǵanyn jazǵan edik.
