Otandyq óndirýshilerge taýarlardy temirjol arqyly tasymaldaý shyǵyndary óteledi

ASTANA. KAZINFORM — Endi kásiporyndarǵa el ishinde basym taýarlardy temirjol arqyly tasymaldaýǵa jumsalǵan shyǵynnyń 50%-yn óteýge bolady. Bul týraly Ónerkásip jáne qurylys mınıstrliginiń baspasóz qyzmeti habarlady. 

Qazaqstanda otandyq óndiristi qoldaýǵa arnalǵan memlekettik quraldar keńeıtilip jatyr.

— Qazaqstanda shyǵarylǵan óńdelgen taýarlardy ishki naryqqa ilgerletýge baǵyttalǵan ónerkásipti memlekettik yntalandyrý sharalaryn kórsetý qaǵıdalaryna ózgerister engizildi.

Endi kásiporyndarǵa el ishinde basym taýarlardy temirjol arqyly tasymaldaýǵa jumsalǵan shyǵyndardyń 50%-yn óteýge bolady — buǵan deıin ishki tasymaldarǵa mundaı shara qoldanylmaǵan, — delingen 

Negizgi qoldaý kórsetkishteri:

* Ótemaqy — tasymaldaý shyǵyndarynyń 50%-yna deıin;
* Eń joǵary mólsheri — 10 myń AEK-ke deıin (43,25 mln teńge);
* respýblıka ishindegi tasymaldarǵa qoldanylady.

Bul shara logıstıkalyq shyǵyndy azaıtýǵa, ónimniń básekege qabilettiligin arttyrýǵa jáne qazaqstandyq quramdy arttyrýǵa baǵyttalǵan.

Sonymen qatar, halyqaralyq sertıfıkattaý shyǵyndaryn óteý kólemi bes ese artty:
— 3 000 AEK-ten 15 000 AEK-ke deıin (shamamen 65 mln teńge).

Halyqaralyq sertıfıkattardyń bolýy qazaqstandyq kompanııalarǵa transulttyq qurylymdardyń tenderlerine qatysýǵa múmkindik beredi.

— Eńbek ónimdiligin arttyrýǵa arnalǵan qoldaý sharalaryn alý úshin salyq kórsetkishteri boıynsha talaptar jeńildetildi. Endi jyl saıynǵy salyq túsiminiń ósýi sharty 7 jyldan az tirkelgen kásiporyndarǵa (buryn — úsh jyl) qoldanylmaıdy, bul «jas» óndiristerdiń memlekettik qoldaýǵa qoljetimdiligin keńeıtedi, — delingen habarlamada.

Aıta ketelik «Dostyq – Moıynty» temirjolynyń ekinshi jelisinde qozǵalys qarqyny qandaı ekeni týraly jazǵan edik.