Otandyq óndirýshilerden satyp alý 8 paıyzǵa azaıǵan – Oljas Bektenov
ASTANA. KAZINFORM – Qazbalar boıynsha jer qoınaýyn paıdalanýshylardyń otandyq kásiporyndardan taýar satyp alý kórsetkishi nebári 17 paıyzdy qurap otyr. Bul týraly Úkimet otyrysynda Premer-mınıstr Oljas Bektenov aıtty.
- Otandyq óndiristi damytý jáne ishki naryqty qorǵaý — Úkimettiń ekonomıkalyq saıasatynyń teńdessiz basymdyǵy. Memleket basshysy atap ótkendeı, kúshti ári básekege qabiletti naqty sektor men otandyq taýar óndirýshilerge arqa súıemeı, qýatty ekonomıka qurý múmkin emes. Alǵa qoıylǵan maqsattardy júzege asyrý aıasynda bıyl Qazaqstanda jalpy quny shamamen 1,7 trıllıon teńgeni quraıtyn 200-ge jýyq jańa ónerkásiptik kásiporyndy iske qosý josparlanǵan. Bizdiń mindetimiz — otandyq zaýyttar men fabrıkalar úshin ónimderin turaqty ótkizýge, qarjylandyrý tetikterine qol jetkizýge jáne ádil básekelestik jaǵdaılaryna kepildik berý, - dedi Úkimet basshysy.
Premer-mınıstrdiń dereginshe, naqty qoldaý tetigin, sondaı-aq taýarlardyń shyǵý teginiń ashyqtyǵy men shynaıylyǵyn qamtamasyz etý úshin osy jyldyń basynan bastap qazaqstandyq taýar óndirýshilerdiń tizilimi iske qosyldy. Onyń kómegimen 70 myńnan astam taýar pozıtsııasy boıynsha 2 700-ge jýyq óndirýshiniń qyzmeti rastaldy.
- Bul tetik qurylys salasynda, memlekettik satyp alýlarda, sondaı-aq ulttyq kompanııalar men jer qoınaýyn paıdalanýshylardyń satyp alýlarynda ǵana emes, jeńildikpen qarjylandyrý alý kezinde de belsendi qoldanylýǵa tıis edi. Sol úshin memlekettik satyp alý aıasynda tek otandyq óndirýshilerden satyp alynatyn taýarlar tizbesin keńeıttik. Alaıda, esepti derekterge sáıkes, 9 aıdyń qorytyndysy boıynsha jasalǵan sharttardyń kólemi ótken jyldyń sáıkes kezeńimen salystyrǵanda 8 paıyzǵa tómendep ketken, - dedi Oljas Bektenov.
Úkimet basshysy kásiporyndardan óz mártebesin rastaý rásimderiniń uzaqqa sozylyp jatqany týraly shaǵymdar da únemi túsip jatqanyn aıtty.
Bul satyp alý salasynda jáne tizilimniń jumysynda birqatar máselelerdiń baryn kórsetedi.
Budan bólek, jer qoınaýyn paıdalanýshylardyń satyp alýlarynda orasan zor rezervter bar. Bul rette qatty paıdaly qazbalar boıynsha jer qoınaýyn paıdalanýshylardyń otandyq kásiporyndardan taýar satyp alý kórsetkishi nebári 17 paıyzdy qurady. Jaǵdaıdy jaqsartý úshin naqty sharalar qabyldaý qajet, - dedi ol.
Aıta keteıik, bıyl satyp alynǵan aýyl sharýashylyǵy tehnıkasynyń 95 paıyzy elimizde qurastyryldy.