Otandyq óndirýshilerdi qoldaý úshin retteletin satyp alý tetigi engiziledi
ASTANA. KAZINFORM — Óndirýshi kásiporyndardy qoldaý maqsatynda elimizde retteletin satyp alýlar tetigi qosylady. Bul shara jergilikti óndiristi damytýǵa, kásiporyndardyń turaqty tapsyryspen qamtamasyz etilýine jáne otandyq taýarlardyń básekege qabiletin arttyrýǵa baǵyttalǵan.
− Kásiporyndardy qoldap, qolda bar qýatty paıdalaný úshin biz jeńil ónerkásiptiń 1162 taýaryn ulttyq rejımnen alyp tastadyq. Retteletin satyp alýlar aıasynda otandyq taýar óndirýshilerge basymdyq beriledi, jergilikti óndiris úlesi joǵary ónimderge tapsyrystar ulǵaıtylady. Uzaq merzimdi kelisimsharttar jasalyp, kásiporyndardyń turaqty damýy úshin kepildendirilgen suranys qalyptasady, − dedi Ónerkásip jáne qurylys mınıstrligi Ónerkásip komıteti tóraǵasynyń orynbasary Muhamed Andaqov Ortalyq kommýnıkatsııalar qyzmetinde ótken baspasóz máslıhatynda.
Sonymen birge, ımportty almastyrýǵa baǵyttalǵan sharalar qabyldanady, ishki naryqta otandyq ónimderdi paıdalaný úlesi artady.
Jeńil ónerkásip ónimderin óndirýge arnalǵan taýarlardyń jekelegen túrlerin kedendik baj tóleýden bosatý qarastyrylǵan.
− Sondaı-aq jeńil ónerkásip kásiporyndarynyń anaǵurlym arzan jáne yńǵaıly óndiristik alańdarǵa, jalpy ınfraqurylymdyq qyzmetterge (sýmen jabdyqtaý, elektr energııasy, kólik), jeńildetilgen ákimshilik rásimderge, jeńildetilgen salyq salý men qarjylandyrýǵa qol jetkizýi úshin 9 arnaıy ekonomıkalyq aımaqta jeńil ónerkásip taýarlary qyzmettiń basym túrleri bolyp engizdi, − dedi Muhamed Andaqov.
Aıta keteıik, ótken jyly Qazaqstannyń jeńil ónerkásip naryǵy 4,3 mlrd AQSh dollar bolyp, onda otandyq óndirýshilerdiń úlesi shamamen 6% boldy. Elimizde jeńil ónerkásipte 1411 kásiporyn, 803 tigin kásiporyny, 481 toqyma buıymdaryn óndirý jáne 122 bylǵary ónimderi kásiporyndary jumys isteıdi.
Bıyl jeńil ónerkásip salasynda 600-ge jýyq jumys ornyn quryp, 9 iri ınvestıtsııalyq joba iske asyrylady. Onyń ishinde Aqtóbe oblysyndaǵy júndi tereń óńdeý jobasy, Túrkistan oblysyndaǵy toqyma buıymdaryn óndiretin maqta kesheni jáne Shymkenttegi toqylǵan shulyq óndirý jobasy bar.