Otandyq óndirýshiler Qytaıda arnaıy ortalyqta óz taýarlaryn sata alady
TsZıANSÝ. KAZINFORM — Saýda jáne ıntegratsııa mınıstri Arman Shaqqalıev QHR-ǵa jumys saparyn Tszıansý provıntsııasynda (Nankın qalasy) jalǵastyrdy.
Provıntsııa gýbernatory Sıýı Kýnlınmen kezdesýde mınıstr óńirlendirý qaǵıdatyn iske asyrý aıasynda ákimshilik pen bıznes ókilderiniń birlesken jumysy oń nátıjeler kórsetip otyrǵanyn atap ótti.
Bıyl taýar aınalymynyń serpindi ósýi jalǵasýda.
2024 jyldyń 7 aıynyń qorytyndysy boıynsha Qazaqstan men QHR arasyndaǵy ózara saýda ótken jyldyń sáıkes kezeńimen salystyrǵanda 2,8%-ǵa ósip, $16,8 mlrd qurady.
Ústimizdegi jyldyń 7 aıynda Qazaqstan men Tszıansý provıntsııasy arasyndaǵy taýar aınalymy $723,3-ten $1 758,1 mln-ǵa deıin 2,4 ese ósti.
Mınıstr orta eseppen alǵanda jyl saıyn Tszıansý $266,8 mlrd astam somaǵa ónim ımporttaıtynyn atap ótti, bul — negizinen ónerkásip jáne aýyl sharýashylyǵy taýarlary.
Osyǵan baılanysty, Qazaqstan provıntsııanyń krıtıkalyq ımportynyń kóptegen pozıtsııalary boıynsha sapaly jetkizilimderdi qamtamasyz etýge daıyn.
Óz kezegindn Gýbernator Sıýı Kýnlın Qazaqstanmen strategııalyq yntymaqtastyqty tolyq qoldaıtynyn, bul úshin Nankın qalasynda Qazaqstanmen saýda men ınvestıtsııalardy damytýdy kúsheıtýge yqpal etetin ınfraqurylym salynǵanyn atap ótti.
Odan ári qazaqstandyq delegatsııa provıntsııa ákimshiliginiń jáne Jiangsu SOHO Holdings Group Co. qoldaýymen boı kótergen «Ortalyq Azııa-Tszıansý» saýda ortalyǵynyń ashylýyna qatysty.
Saltanatty sharaǵa Nankın qalasy men provıntsııa basshylyǵy, qazaqstandyq bıznes pen kvazımemlekettik sektor ókilderi qatysty.
Kópqabatty ortalyq — Ortalyq Azııa elderiniń kompanııalaryn ornalastyrý jáne olardyń jumysy úshin kóp fýnktsıonaldy platforma.
Ortalyqtyń ashylý saltanatynda qonaqtarǵa Qazaqstan, Ózbekstan, Tájikstan, Túrikmenstan eksporttyq ónimderi bar kórme pavılony tanystyryldy.
«Búgin bul alańda 50-ge jýyq qazaqstandyq kompanııa óz ónimderin usyndy. Bul satyp alýshylarǵa qazaqstandyq ónimdermen jeke tanysýǵa múmkindik beredi. Árıne, osy alańda óz ónimderin tanystyra otyryp, Qytaımen taýar aınalymyn ulǵaıtýǵa múmkindik bolady», — dedi Arman Shaqqalıev.
Ortalyqtyń alańynda bir saǵat ishinde Douying platformasyndaǵy qazaqstandyq azyq-túlik ónimderi naqty ýaqyt rejıminde $15 myń somaǵa satyldy.
QazTrade shıkizattyq emes eksportty damytý jáne ilgeriletý salasyndaǵy ulttyq ınstıtýt pen SOHO kompanııasy «Birlesken ortalyq týraly» kelisimshartqa qol qoıyldy.
Kelisimshart sheńberinde ulttyq kompanııalar, qarjy ınstıtýttary jáne bıznes qoǵamdastyqtarynyń ortalyqta ornalasý jaıly sharttary kelisildi.
Ortalyqtyń Tszıansý óńirinde damyǵan ınfraqurylym esebinen jumys isteýi Qytaı naryǵyna qol jetkizýdi jeńildetedi jáne óz kezeginde «Bir beldeý, bir jol» boıynda ornalasqan Ortalyq Azııanyń bes eliniń qajettilikterin qamtamasyz etýge yqpal etedi.
Taraptar sondaı-aq Astana qalasynda balamaly mýltıfýnktsıonaldy ortalyqty iske qosýdy talqylady.
Keshendi joba qytaılyq jáne qazaqstandyq taýarlardy usynatyn jer ǵana emes, munda bıznes ókilderi halyqaralyq seriktestermen kelisimsharttar jasasyp, iskerlik kelissóz júrgizip, qarjylyq jáne konsaltıngtik qyzmetter alyp, saýda kelisimderin rásimdeı alady.
