Otandyq óndirýshiler de, tutynýshylar da syrttan keletin sapasyz ónimderden qorǵalmaǵan - depýtat

Búgin Májilistiń Agrarlyq máseleler jónindegi komıteti S.Seıfýllın atyndaǵy Qazaq agrotehnıkalyq zertteý ınstıtýtynda veterınarııa men fıtosanıtarııa qaýipsizdigi máselesi boıynsha kóshpeli otyrys ótkizdi, dep habarlaıdy Kazinform.

«Іs-shara barysynda qordalaǵan máselelerdi, onyń ishinde veterınarııa men fıtosanıtarııaǵa qatysty normalardy talqylamaqpyz. Búginde eki ınspektsııanyń da óz deńgeıinde jumys istep otyrmaǵandyǵyn kórip otyrmyz. Qazirgi ýaqytta bizdiń óndirýshilerimiz de, tutynýshylarymyz da syrttan keletin sapasyz ónimderden qorǵalmaǵan», - dedi Májilis depýtaty Aıdarbek Hodjanazarov otyrys aldynda BAQ ókilderine bergen suhbatynda.

Onyń atap ótýinshe, búginde sýpermarketterdiń de, shaǵyn dúkenderdiń de sóresinde syrttan kelgen taýarlar tolyp tur.

«Óıtkeni, bizdiń eki ınspektsııamyz – kim kóringenge ashyq esik. Qazirgi ýaqytta ımporttalatyn azyq-túlik ónimderi ne bári 5 kórsetkish boıynsha ǵana tekseriledi. Al qazaqstandyq óndirýshiler Reseı naryǵyna shyǵý úshin ónimderin 100-den astam, tipti 120-daı qajetti sertıfıkattaýdan, túrli tekserýlerden ótkizýi tıis. Sondyqtan búginde jaramaı qalǵan ne bolmasa ózge naryqtar úshin sapasyz bolǵan ónimder bizge aǵylyp jatyr», - dedi depýtat.

Osy oraıda ol bul saladaǵy problemalyq máselelerdi sheshý qajettigine nazar aýdartty.