Otandyq óndiris pen jańa tehnologııalar – Sarandaǵy zaýytta mańyzdy máseleler talqylandy
ASTANA. KAZINFORM — Quryltaı depýtattary Aısulý Súleımenova men Aleksandr Danılov, Qazaqstan Halyq Keńesiniń músheleri Vıtalıı Tvarıonas, Ývaıs Djanaev, Vıtalıı Hmelevskıı jáne Ulttyq ekonomıka vıtse-mınıstri Erlan Saǵynaev Saran qalasyndaǵy Tengri Tyres shına zaýytynyń ujymymen kezdesti.
Jıynda Memleket basshysy Qasym-Jomart Toqaevtyń Qazaqstan halqyna arnaǵan «Jańa tarıhı kezeńdegi Qazaqstannyń ózekti mindetteri» atty Joldaýynda belgilengen negizgi basymdyqtar talqylandy. Ásirese ekonomıkanyń naqty sektoryn damytý, ınvestıtsııa tartý, ónerkásip salalaryn ártaraptandyrý jáne otandyq óndiristi zamanaýı tehnologııalarmen jańǵyrtý máselelerine basa nazar aýdaryldy.
Prezıdent óz Joldaýynda eldiń ekonomıkalyq qýatyn arttyrý, zamanaýı ınfraqurylymdy damytý jáne ozyq tehnologııalardy engizý egemendikti nyǵaıtyp, halyqtyń ál-aýqatyn jaqsartýdyń mańyzdy sharttary ekenin atap ótti. Sondaı-aq elimizdiń óndiristik múmkindikterin keńeıtýge, jańa kásiporyndar ashýǵa jáne sapaly jumys oryndaryn qurýǵa erekshe mán berildi.
Bul mindetter Tengri Tyres sııaqty iri ónerkásip oryndarynyń jumysyna tikeleı qatysty. Básekege qabiletti ónim shyǵarý, jańa tehnologııalardy engizý jáne óndiristik áleýetti arttyrý elimizdiń ımportqa táýeldiligin azaıtyp, syrtqy naryqqa shyǵýyna múmkindik beredi.
Quryltaı depýtaty Aleksandr Danılov Memleket basshysynyń halyqtyń ál-aýqatyn arttyrýǵa jáne ekonomıkany turaqty damytýǵa baǵyttalǵan bastamalarynyń mańyzyn atap ótti.
— Prezıdent Joldaýy elimizdiń aldaǵy damý baǵytyn aıqyndaıdy. Onda ekonomıkany nyǵaıtýǵa, zamanaýı tehnologııalardy engizýge jáne ónerkásipti damytýǵa erekshe kóńil bólingen. Otandyq óndiristi órkendetý, jańa jumys oryndaryn ashý jáne eńbek ujymdaryn qoldaý — Qazaqstan ekonomıkasynyń turaqtylyǵyn qamtamasyz etetin negizgi tirekter. Árbir kásiporynnyń artynda adamdardyń kásibı biliktiligi, jaýapkershiligi men kúndelikti eńbegi tur. Sondyqtan óndiristi damytýǵa múmkindik jasap, ár adamnyń eńbegine laıyqty baǵa berilýi mańyzdy, — dedi Aleksandr Danılov.
Kezdesýde ónerkásipti damytý úshin bilikti mamandar daıarlaý jáne olardyń kásibı bilimin únemi jetildirý qajettigi de aıtyldy. Qazirgi kásiporyndardyń básekege qabiletti bolýy, eń aldymen, bilikti mamandar men olardyń jańa tehnologııalardy meńgerýine baılanysty ekendigi sóz boldy.
Búginde elimizdiń aldynda aýqymdy mindetter tur. Olardy júzege asyrýǵa bıznes ókilderi, eńbek ujymdary jáne árbir azamat óz úlesin qosýy qajet. Osy turǵydan alǵanda, óńirlerde halyqpen ashyq pikir almasý memlekettik saıasattyń negizgi baǵyttaryn túsindirýge jáne turǵyndardy tolǵandyrǵan suraqtardy tikeleı talqylaýǵa múmkindik beredi.
Kezdesý sońynda zaýyt qonaqtary men qyzmetkerleri Joldaýda belgilengen mindetterdi oryndaý úshin árbir qazaqstandyq óz jumys ornynda jaýapkershilikpen eńbek etip, ortaq iske úles qosýy qajet ekenin atap ótti.
Aıta keterligi, Tengri Tyres — jeńil jáne júk kólikterine arnalǵan shınalar óndirisimen aınalysatyn ınnovatsııalyq kásiporyn. Qaraǵandy oblysyndaǵy iri ónerkásip oryndarynyń biri. Kásiporyn óńirdiń júzdegen turǵynyn turaqty jumyspen qamtyp otyr.
