Qazaqstandyq oqýshylar Balqan matematıkalyq olımpıadasynda úzdikter qataryna endi ️
ASTANA. KAZINFORM — Qazaqstan quramasy álemdegi eń bedeldi zııatkerlik alańdardyń biri Balkan Mathematical Olympiad 2026 jarysynda úzdikter qatarynan kórindi, dep habarlaıdy Oqý-aǵartý mınıstrliginiń baspasóz qyzmeti.
3-8 mamyr kúnderi Grekııanyń Salonıkı qalasynda ótken Balqan matematıkalyq olımpıadasynda qazaqstandyq oqýshylar 6 medal jeńip alyp, 24 eldiń ishinde jalpy komandalyq esepte 6-orynǵa ıe boldy.
Bıylǵy dodaǵa Albanııa, Bolgarııa, Grekııa, Rýmynııa, Serbııa, Túrkııa, Soltústik Makedonııa jáne basqa da myqty matematıkalyq mektepteri bar 24 memleketten 148 qatysýshy qatysty. Qatysýshylar arasynda álemdik deńgeıde tanylǵan olımpıadalyq mektepterdiń ókilderi boldy.
— Osyndaı básekeli ortada Qazaqstan quramasy joǵary nátıje kórsetip, turaqty daıyndyq pen júıeli jumystyń jemisin dáleldedi. Jalpy esepte Qazaqstan quramasynyń qorjynyna 1 altyn, 2 kúmis jáne 3 qola medal tústi, — delingen habarlamada.
Altyn medal ıegeri — Mýrat Tımýr, Almaty qalasyndaǵy Haileybury Almaty mektebiniń 12-synyp oqýshysy.
Kúmis medal ıegerleri:
Alıasqar Sultanáli — Astana qalasyndaǵy «Bilim-ınnovatsııa» lıtseı-ınternatynyń 10-synyp oqýshysy;
Orynbasar Berdibek — Atyraý oblystyq «Bilim-ınnovatsııa» lıtseı-ınternatynyń 11-synyp oqýshysy.
Qola medal ıegerleri:
Beıganov Batyrhan — Almaty qalasyndaǵy Respýblıkalyq fızıka-matematıka mektebiniń 10-synyp oqýshysy;
Erkebulanuly Alı — Almaty qalasyndaǵy Nurorda mektebiniń 11-synyp oqýshysy;
Ansatov Arnur — Qyzylorda oblystyq № 9 «Bilim-ınnovatsııa» lıtseı-ınternatynyń 11-synyp oqýshysy. ️
Ulttyq quramanyń jetekshileri — Qazaq-Amerıka ýnıversıteti prezıdenti Asylbek Isahov jáne «Astana-Nura» zııatkerlik mektebiniń mamany Muhtar Qabaq.
