Otandyq marketpleısti iske qosýdy pysyqtap jatyrmyz — mınıstr
ASTANA. KAZINFORM — Elimizde jańa satý jáne saýda jasaý platformasy iske qosylady. Bul týraly Saýda jáne ıntegratsııa mınıstri Arman Shaqqalıev málim etti.
— Úkimet basshysynyń tapsyrmasy boıynsha ınnovatsııalyq agromarketpleıs ázirlep jatyrmyz. Bul júıe óndirýshiler, saýda jelileri jáne memlekettik organdar arasynda tikeleı tsıfrlyq baılanys ornatyp, deldaldardy jáne ashyq emes ótkizý shemalaryn joıady, — dedi Arman Shaqqalıev Úkimet otyrysynda.
Osy oraıda mınıstr jańa formattaǵy otandyq B2B platformasyn iske qosý pysyqtalyp jatqanyn aıtyp otyr.
— Ol kóterme ımportty retteýge shaǵyn jáne orta bıznesti qoldaýǵa baǵyttalǵan. Osyǵan oraı otandyq elektrondyq platformany ázirlep, sheteldik elektrondyq platformalarmen ıntegratsııalaý josparda bar. Qazir platformany tolyq iske asyrý úshin sertıfıkattaý rásimindegi tehnıkalyq kedergini joıý máselesin naqtylap jatyrmyz, — deıdi ol.
Sondaı-aq mınıstr Qazaqstan men Qytaı Halyq Respýblıkasynyń Úkimeti arasyndaǵy 1996 jylǵy saýda kelisimine ózgerister engizý máselesi talqylanyp jatqanyn tilge tıek etti.
Buǵan deıin vedomstvo basshysy taýar saýdasy salasyn tsıfrlandyrý barysy týraly aıtyp berdi.