Otandyq lızıng naryǵyn damytýdyń negizgi baǵyttary aıqyndaldy
ASTANA. KAZINFORM — Qarjy naryǵyn retteý jáne damytý agenttiginiń tóraǵasy Mádına Ábilqasymovanyń málimdeýinshe, elimizde lızıng naryǵy retteýdi jáne naryq qatysýshylary tap bolatyn problemalardy anyqtap, tıisti sheshimderdi qabyldaýdy talap etedi.
— Lızıngtik kompanııalarmen, salalyq qaýymdastyqpen birlesip, salany damytýǵa arnalǵan sheshimderdi ázirleý jumysyna belsendi qatysamyz dep oılaımyn. Biz jumysty júrgizý qajet úsh negizgi baǵytty kórip otyrmyz. Birinshi baǵyt — jeke lızıngtik kompanııalardyń memlekettik qoldaý baǵdarlamalaryn iske asyrýǵa qatysýyn keńeıtý. Buǵan deıin atap ótkenimdeı, búginde lızıngtik qarjylandyrýdyń 93%-yn damý ınstıtýttary qamtamasyz etip otyr. Bul Ónerkásipti damytý qory men QazAgroQarjy. Olar jeńildetilgen bıýdjettik qarjylandyrý esebinen qarjylandyrylady, — deıdi M. Ábilqasymova.
Búginde elimizde 2023–2029 jyldarǵa arnalǵan óńdeýshi ónerkásipti damytý tujyrymdamasy jáne 2021–2030 jyldarǵa arnalǵan agroónerkásip keshenin damytý tujyrymdamasy bar. Atalǵan baǵdarlamalar aıasynda lızıngtik qarjylandyrý qarastyrylǵan.
— Birinshiden, kásipkerlerdi memlekettik qoldaý baǵdarlamalaryna jeke lızıngtik kompanııalardy keńinen tartý. Bul qadam básekelestik ortany qalyptastyrýǵa, kásipkerlik sýbektileri arasynda lızıngtik qyzmetti keńinen taratýǵa yqpal etedi dep sanaımyz. Osylaısha, kásipkerlerdi qoldaý quraldaryna naryqtyń barlyq qatysýshyny teńdeı qamtý kózdelip otyr. Ekinshi mańyzdy baǵyt — lızıngtik qyzmetti keshendi retteý men statıstıka jınaý ınfraqurylymyn damytý. Lızıng naryǵyna qatysty esepti jetildirý qajet. Birizdendirilgen esep quralyn engizip, qurylymdyq aqparattyq baza qalyptastyrý qajet jáne qyzmettiń biryńǵaı standarttaryn aıqyndaǵan abzal. Bul naryqtyń ashyqtyǵyn arttyryp, sapaly taldaýdy qamtamasyz etýge jáne memlekettik saıasattyń negizdelgen sheshimderin qabyldaýǵa múmkindik beredi, — deıdi ol.
Agenttik basshysynyń aıtýynsha, lızıngtik kompanııalardyń sany men róliniń artýyn eskere otyryp, korporatıvtik basqarý standarttaryn engizýge, aqparattyń ashyqtyǵyna jáne klıenttermen ózara is-qımylǵa erekshe kóńil bólý qajet. Atalǵan sharalar ınvestorlardyń lızıngtik kompanııalarǵa degen senimin arttyryp, lızıng salasynda zamanaýı ári ashyq retteý júıesin qalyptastyrýǵa septigin tıgizedi.
— Úshinshi baǵyt — jeke lızıngtik kompanııalar úshin qarjylandyrý kózderin keńeıtý. Búginde qor naryǵy quraldaryn kapıtal kózi retinde paıdalaný keń taralmaǵan, sebebi jeke lızıng berýshilerdiń basym bóligi — shaǵyn jáne orta kompanııalar. Biz kóbinese lızıngtik kompanııalar qarjylandyrýdy ekinshi deńgeıli bankterden nesıe alý arqyly tartatynyn kórip otyrmyz. Bastapqyda qarjylandyrý quny joǵary bolyp qalyptasady, bul óz kezeginde lızıngtik operatsııa barysynda túpkilikti qyzmet alýshylarǵa da, lızıng alýshylarǵa da áser etedi. Osyǵan baılanysty basty mindet — lızıngtik kompanııalar úshin qarjylandyrý qunyn tómendetý. Lızıng quraly — óńdeýshi ónerkásip kompanııalary úshin de, jalpy búkil naqty sektordy jańǵyrtý úshin de asa tıimdi qural. Sebebi ol nesıege qaraǵanda qoljetimdi, uzaq merzimdi bolýy tıis, sondaı-aq shaǵyn jáne orta bıznes úshin keń aýqymdy jabdyq túrlerine qol jetkizýdi qamtamasyz etýge múmkindik beredi, — dep tolyqtyrdy Qarjy naryǵyn retteý jáne damytý agenttiginiń tóraǵasy.
Aıta keteıik, Qazaqstanda lızıng naryǵynyń kólemi 2,7 trln teńgege jetti.
Buǵan deıin qazaqstandyq kásipkerlerge lızıng alýdyń tıimdiligi týraly jazǵan edik.
Búgin elordada «Qazlızıng — 2025: ónerkásip pen kásipkerlikti qarjylandyrý kózi retinde Qazaqstanda lızıngti damytý perspektıvalary» atty alǵash konferentsııasy ótip jatyr.