Otandyq kýrsanttar drondarǵa qarsy tehnologııany ázirledi
ASTANA. KAZINFORM — Radıoelektronıka jáne baılanys áskerı-ınjenerlik ınstıtýtynda kásibı áskerı daıarlyqpen qatar kýrsanttardyń ǵylymı-zertteý jáne jobalaý qyzmetine erekshe kóńil bólinedi.
Bolashaq ofıtserler zamanaýı tehnologııalardy meńgerip qana qoımaı, qorǵanys pen qaýipsizdik salasyndaǵy ózekti mindetterdi sheshýge baǵyttalǵan ınjenerlik jobalardy da ázirleýmen aınalysady.
Osyndaı jobalardyń biri — 3-kýrs kýrsanty Shyńǵyshan Shyntemırovtyń ázirlemesi. Ol basqarý jáne baılanys arnalaryn basýǵa, radıoelektrondyq kedergiler jasaýǵa, sondaı-aq ushqyshsyz ushý apparattaryna qarsy áreket etýge arnalǵan shaǵyn kólemdi radıoelektrondyq yqpal etý qurylǵysyn oılap tapty. Bul qurylǵy Wi-Fi jelileriniń jumysyn buǵattaı alady jáne arnaıy mindetterdi oryndaý barysynda qoldanýǵa múmkindik beredi.
Taǵy bir ınnovatsııalyq jobany kýrsant Vasılıı Kopıltsev usynyp otyr. Onyń ázirlegen Under Car Vision qurylǵysy avtokólikterdiń astyńǵy bóligin tekserýge arnalǵan. Júıe aýa raıynyń kez kelgen jaǵdaıynda sapaly vızýaldy baqylaýdy qamtamasyz etetin qasıetke ıe. Qurylǵy elektr jelisinen de, akkýmýlıatordan da qýat alady. Bul ony turaqty baqylaý beketterinde de, kóshpeli tekserýler kezinde de tıimdi paıdalanýǵa múmkindik beredi.
— Búginde ınjener tek qoldanystaǵy tehnologııalardy meńgerip qana qoımaı, naqty mindetterge saı jańa sheshimder ázirleı bilýi qajet. Sondyqtan biz kýrsanttardy alǵashqy kýrstan bastap ǵylymı-zertteý jáne jobalaý jumystaryna tartamyz. Óz jobalarymen jumys isteý olardyń ınjenerlik oılaý qabiletin damytyp, taldaý jasaýǵa, tájirıbe júrgizýge jáne tyń sheshimder tabýǵa úıretedi. Dál osyndaı quzyretter bolashaq ofıtserlerdiń kásibı damýynyń negizin qalyptastyryp, qazirgi qaýipsizdik salasyndaǵy syn-qaterlerge tıimdi jaýap berýge múmkindik beredi, — dedi Radıoelektrondyq barlaý jáne radıoelektrondyq kúres kafedrasynyń aǵa oqytýshysy, joba jetekshisi podpolkovnık Aleksandr Kýshnarev.
Radıoelektronıka jáne baılanys áskerı-ınjenerlik ınstıtýtynda kýrsanttardyń ǵylymı áleýetin damytý — daıarlyqtyń basym baǵyttarynyń biri. Injenerlik jobalarmen aınalysý bolashaq ofıtserlerge teorııalyq bilimderin tájirıbede qoldanýǵa, konstrýktorlyq daǵdylaryn jetildirýge jáne qazirgi zaman talaptaryna saı tıimdi sheshimder ázirleýge jol ashady.
Kýrsanttardyń ǵylymı ázirlemeleri salalyq kórmelerde, baıqaýlarda jáne ǵylymı-praktıkalyq konferentsııalarda turaqty túrde tanystyrylyp keledi. Bul bolashaq áskerı ınjenerlerdiń joǵary deńgeıdegi daıarlyǵyn jáne olardyń ǵylymı-ınnovatsııalyq áleýetin aıqyn kórsetedi.
Aıta ketelik Qarýly kúshterde drondarǵa qarsy qorǵanys tásilderi jetildirip jatqaný týraly jazǵan edik.
