Otandyq kınologııany damytýǵa úles qosqan 20 azamat marapattaldy
ASTANA. KAZINFORM — Búgin Ekologııa jáne tabıǵı resýrstar mınıstrliginde Qazaqy tazy men tóbet kúnine arnalǵan saltanatty is-shara ótti.
Іs-sharaǵa Ekologııa jáne tabıǵı resýrstar mınıstri Álibek Qýantyrov Qazaqstan Kınologtar odaǵynyń ókilderi, kınologtar, ıt ósirýshiler, hendlerler jáne ulttyq ıt tuqymdaryn saqtaý men damytýǵa úles qosyp júrgen sala mamandary qatysty.
Álibek Qýantyrov qatysýshylardy merekemen quttyqtap, qazaqy tazy men tóbetti saqtaý, olardyń asyl tuqymdyq jáne tabıǵı qasıetterin damytý, sondaı-aq otandyq kınologııany qoldaý baǵytyndaǵy jumystyń mańyzdylyǵyn atap ótti.
Saltanatty rásim barysynda ulttyq ıt tuqymdaryn saqtaý, ósimin molaıtý jáne otandyq kınologııany damytýǵa úles qosqan 20 azamat marapattaldy. Olarǵa Ekologııa jáne tabıǵı resýrstar mınıstrliginiń Qurmet gramotalary men Alǵys hattary tabystaldy.
Aıta keteıik, bıyl Qazaqstanda Qazaqy tazy men tóbet kúni alǵash ret atalyp ótip otyr. Merekelik data retinde 3 qyrkúıektiń tańdalýynyń ózindik máni bar. 2024 jylǵy dál osy kúni Halyqaralyq kınologııalyq federatsııa (FCI) qazaq tazysyn aldyn ala tanyp, № 372 halyqaralyq standartyn bekitti. Qazaqstan tuqymnyń shyqqan eli retinde tanyldy.
Qazirgi ýaqytta elimizde ulttyq ıt tuqymdaryn saqtaý, asyl tuqymdyq qoryn qalyptastyrý, qazaqy tazynyń tabıǵı jáne jumys qasıetterin saqtap, halyqaralyq deńgeıde tanytý baǵytyndaǵy jumystar jalǵasady.
Budan buryn 3 qyrkúıek — Qazaqy tazy men tóbet kúni Jibek Joly telearnasy Prezıdent Teleradıokesheni túsirgen «Tazy. Ult qazynasy» derekti fılmin kórsetetinin jazǵanbyz.
