Otandyq kásiporyndardy qoldaý úshin qandaı zańnamalyq ózgerister engiziledi

ASTANA. KAZINFORM – Búgin Úkimet otyrysynda Ónerkásip jáne qurylys mınıstri Qanat Sharlapaev otandyq kásiporyndardy qoldaý úshin qandaı zańnamalyq ózgerister engiziletindigin aıtty.

«Otandyq kásiporyndardy qoldaý aıasynda kelesideı zańnamalyq ózgerister pysyqtalýda. Birinshi - iri tapsyrys berýshilerdiń otandyq taýarlar men qyzmetterdi paıdalaný baǵdarlamalaryn bekitý jáne uzaq merzimdi sharttar men ofteık kelisimsharttar jasasý mindettemelerin belgileý. Ekinshi – memlekettik bıýdjet esebinen júrgiziletin qurylys jumystarynda otandyq qurylys materıaldary men jabdyqtaryn qoldanýdy baqylaý komıssııasyn qurý. Úshinshi – jańa óndiristik nysandar qurylysy barysynda otandyq taýar óndirýshilerden materıaldar men jabdyqtardy satyp alý boıynsha mindettemelerdi belgileý», - dedi Qanat Sharlapaev.

Sonymen qatar ol óńdeý ónerkásibi kásiporyndaryn qoldap, tolyq júkteý jumystary jalǵasyp jatqanyn jáne mınıstrliktiń turaqty baqylaýynda bolatyndyǵyn atap ótti.