Otandyq kásiporyndardan satyp alý sharttaryn buzǵandarǵa jaýapkershilik engiziledi
ASTANA. KAZINFORM – Otandyq kásiporyndardan satyp alý sharttaryn buzǵan jer qoınaýyn paıdalanýshylarǵa jaýapkershilik engiziledi. Bul týraly Úkimet otyrysynda Premer-mınıstr Oljas Bektenovtiń saýalyna jaýap bergen Ónerkásip jáne qurylys mınıstri Ersaıyn Naǵaspaev málim etti.
Otyrysta Úkimet basshysy mınıstrden: «Jer qoınaýyn paıdalanýshylardyń satyp alý kólemi óte aýqymdy. Bul baǵytta qalaı ózimizdiń otandyq káiporyndardy qoldaımyz?», - dep suraǵan edi.
Saýalǵa jaýap bergen mınıstr ótken jyly osy baǵytta eki óte mańyzdy ózgeris engizilgenin aıtty.
- Birinshisi, ár jer qoınaýyn paıdalanýshy standartqa saı emes taýarlardy tek tizilim platformasy arqyly satyp alady. Osy protsesti mınıstrlik baqylaıdy, qadaǵalaıdy. Ekinshisi, lokalızatsııany damytý baǵdarlamasy engizildi. Endi ár jer qoınaýyn paıdalanýshy óz baǵdarlamasyn ázirleıdi. Sodan keıin mınıstrlikpen kelisedi. Qazirgi ýaqytta shamamen 60-tan astam baǵdarlama bar, ázirlendi. Aldaǵy ýaqytta olardy lıtsenzııaǵa engizýdi josparlap otyrmyz. Eger talaptar buzylsa, mindetti túrde jaýapkershilik kózdeledi. Osy jumys mınıstrliktiń qatań baqylaýynda bolady, - dedi Ersaıyn Naǵaspaev.
Elimizde otandyq óndiristi damytý aıasynda mys balqytý zaýyttaryn salý, avtomobıl jáne temirjol mashına jasaý salalarynda óndiristik klasterler qurý, sondaı-aq qurylys materıaldarynyń ishki naryqtaǵy úlesin 80 paıyzǵa deıin arttyrý josparlanyp otyr.