Otandyq kásipkerlerge EAEO-nyń memlekettik satyp alý naryǵyna jol ashyldy — Quryltaı Zań qabyldady
ASTANA. KAZINFORM — Búgin Qurylytaı otyrysynda depýtattar «2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgerister engizý jóninde hattamany ratıfıkatsııalaý týraly» zań jobasyn eki oqylymda qarap, qabyldady.
Qujatty tanystyrǵan Saýda jáne ıntegratsııa mınıstri Arman Shaqqalıevtyń málimetinshe, hattamaǵa 2025 jylǵy 28 shildede Máskeý qalasynda Eýrazııalyq ekonomıkalyq odaqqa múshe memleketterdiń basshylary qol qoıdy. Onyń erejeleri Odaq aıasyndaǵy quqyqtyq retteýdi jetildirýge jáne quqyq qoldaný praktıkasy barysynda anyqtalǵan olqylyqtardy joıýǵa baǵyttalǵan.
— Usynylyp otyrǵan hattamada Eýrazııalyq ekonomıkalyq odaq týraly shartqa 30 túzetý engizý kózdelgen. Olar ishki naryqtyń jumys isteýi, memlekettik satyp alý, tehnıkalyq retteý, kórsetiletin qyzmetter saýdasy, básekelestik, elektr energetıkasy jáne kólik máselelerin qamtıdy. Atap aıtqanda, Eýrazııalyq ekonomıkalyq komıssııanyń Odaqtyń ishki naryǵyndaǵy kedergilerdi ádisnamalyq turǵudan saralaý jáne tosqaýyldar men shekteýlerdi joıyldy dep taný jónindegi ókilet bekitiledi. Atalǵan norma komıssııa jumysynyń biryńǵaı tásilin qalyptastyrýdyń quqyqtyq negizin aıqyndaıdy jáne elderimiz arasyndaǵy kedergisiz ortany qalyptastyrýdy jaqsartýǵa yqpal etedi, — dedi ol.
Kásipkerler úshin EAEO naryǵyna jol ashylady
Mınıstr Qazaqstannyń memlekettik satyp alý salasyndaǵy bastamasyn iske asyrýǵa erekshe nazar aýdardy.
— Hattamada banktik kepildikterdi ózara taný bekitiledi. Bul otandyq kásipkerlerge qazaqstandyq banktiń kepildigi bolǵan jaǵdaıda Odaqqa múshe memleketterdiń memlekettik satyp alý naryqtaryna shyǵýǵa múmkindik beredi. Buǵan deıin basqa múshe memleketter bankterinen kepildik alý talap etilgen. Budan basqa, ákelý kedendik bajdaryn tóleýge baılanysty málimetter almasý jónindegi normalardyń qaıtalanýy joıylady. Óıtkeni mundaı aqparat almasý Eýrazııalyq ekonomıkalyq odaqtyń Keden kodeksinde kózdelgen. Sondaı-aq komıssııanyń múshe memleketter usynatyn aqparatty paıdalaný maqsattary naqtylanady, — dedi Arman Shaqqalıev.
Onyń atap ótýinshe, básekelestik salasynda komıssııa sheshimderi oryndalatyn aýmaqtaǵy memlekettiń zańnamasyn eskere otyryp, olardy májbúrlep oryndatý tártibi naqtylanady. Osylaısha, engiziletin ózgerister qaıtalanatyn erejelerdi joıýǵa, qoldanystaǵy tetikterdi naqtylaýǵa jáne Odaq aıasyndaǵy jekelegen rásimderdiń ashyqtyǵyn arttyrýǵa baǵyttalǵan.
Zań jobasyn talqylaý barysynda depýtat Almat Jókebaev qujat Eýrazııalyq ekonomıkalyq odaqtyń basty shartyna, sonymen qosa 9 qosymsha hattamaǵa ózgerister engizip, kedendik ákelý baj salyqtary boıynsha aqparat almasýǵa qatysty bólimdi tolyǵymen alyp tastaýdy kózdeıtinen nazar aýdardy. Osyǵan oraı ol atalǵan bólimdi alyp tastaý kúndelikti kedendik ákelý bajdary boıynsha aqparatty almasý jumysyna kedergi keltirý múmkindigine alańdaýshylyq tanytty.
— Ol tetikter Keden kodeksinde tolyǵymen qamtylǵan ba? Sol tetikterdiń bolmaýy jalpy kedendik ákimshilendirýge, ózara aqparattyq jumystarǵa keri áserin tıgizbeı me? , — dep surady depýtat negizgi baıandama jasaǵan Arman Shaqqalıevten.
Mınıstr atalǵan tetikterdiń Keden kodeksine engizilgenin atap ótti. Sondyqtan erejeler qaıtalanbas úshin ol tetikter talqylaýǵa shyǵarylǵan kelisimsharttan alynyp tastalǵan. Al keden organdarynyń arasynda aqparat almasý burynǵydaı jalǵasa beredi.
Jalpy hattamanyń mynadaı negizgi 3 artyqshylyǵy bar:
— kedergilerdi anyqtaý jáne joıýdyń ortaq tártibi belgilenedi;
— memlekettik satyp alý tártibi jaqsaryp, qazaqstandyq bank kepildikteri elektrondy túrde tanylady;
— ortaq elektr energetıkalyq naryǵynyń jumys isteý tártibi naqtylanady.
EAEO elderi halyqaralyq júk tasymalyn tsıfrlandyrýǵa kóshedi
Al depýtat Gúlishan Nahbaeva mınıstrden Odaqqa múshe memleketterdiń halyqaralyq avtomobıl tasymaldary salasynda elektrondyq ruqsattardy engizýge daıyndyǵyn surady.
— Búkil múshe memleket osy tetikti engizýge daıyn. Osy jyldyń 15 qazanynda Astanada pılottyq joba iske qosyldy. Bul pılottyq joba bizge qaǵazsyz elektrondyq ruqsatty resimdeý jáne almasý tártibin aıqyndaıdy. Bul túzetýler tsıfrlandyrý mehanızmderin tolyq engizýge jol ashady, — dedi Arman Shaqqalıev.
Depýtat Konstantın Petrov qaralyp otyrǵan hattamada memlekettik satyp alý týraly aqparatty jarııalaý talaptary naqtylanyp, banktik kepildikterdi ózara taný bekitiletinine nazar aýdardy.
— Osy hattama ratıfıkatsııalanǵannan keıin qarapaıym qazaqstandyq kásipker úshin naqty ne ózgeredi? Otandyq kásipkerlerdiń EAEO-ǵa múshe basqa elderdiń memlekettik satyp alýyna qatysýyna kedergi keltiretin qandaı máseleler sheshiledi? , — dep surady ol mınıstrden.
Arman Shaqqalıevtiń aıtýyna qaraǵanda, EAEO-ǵa múshe memleketter arasynda banktik kepildikterdi ózara taný týraly kelisim kúshine endi.
— Endi Qazaqstanda qazaqstandyq bank bergen kepildik EAEO-ǵa múshe elderdiń birindegi retteletin satyp alýǵa qatysqysy keletin otandyq óndirýshi úshin qosymsha rásimdersiz tanylady. Ekinshiden, ıntegratsııa úderisindegi damý qarqynynyń árkelkiligi joıylady. Qazaqstanda memlekettik satyp alý úderisteri tsıfrlandyrylǵan, kásipkerler úıden shyqpaı-aq satyp alýǵa qatysa alady. Osy aıyrmashylyqtar joıylyp, Odaq elderiniń naryǵyna kedergisiz qol jetkizýge jol ashylady, — dedi Saýda mınıstri.
Osydan keıin depýtattar zań jobasyn birinshi oqylymda maqudap, ekinshi oqylymda qabyldady.
