Otandyq kásipkerler ónimderin Túrkistandaǵy arnaıy kórmede sheteldik seriktesterge usyna alady
TÚRKІSTAN. KAZINFORM — Túrkistan qalasynda 18-19 qyrkúıek kúnderi «Qazaqstan úzdik taýary — 2026» óńirlik kórme-konkýrsy ótedi. Aýqymdy sharaǵa Túrkistan oblysynyń 200-den astam taýar óndirýshisi qatysyp, óz ónimderin tanystyrady.
Eki kúnge josparlanǵan kórme-konkýrs otandyq óndiristi ilgeriletýge, jergilikti ónimderdi jańa ótkizý naryqtaryna shyǵarýǵa jáne kásipkerler arasynda iskerlik baılanystar ornatýǵa baǵyttalǵan. Sharaǵa kásipkerlermen qatar iri saýda jelileriniń ókilderi, baıerler, dıstrıbıýtorlar, ınvestorlar, marketpleıster, qarjy jáne logıstıka kompanııalary, memlekettik organdar men sheteldik seriktester qatysady.
Kórme alańynda azyq-túlik, jeńil jáne toqyma ónerkásibi, jıhaz, qurylys materıaldary, aýyl sharýashylyǵy ónimderi, qolóner jáne basqa da óndiris baǵyttaryndaǵy taýarlar usynylady. Sonymen qatar óńirde óndiriletin zamanaýı tehnologııalyq ónimder men óndiristik jabdyqtar tanystyrylady.
Kórmeniń mańyzdy bóligi — «Túrkistanda jasalǵan» arnaıy ekspozıtsııasy. Munda oblystyń ár aýdan-qalasynda óndiriletin ónimder bir alańǵa jınaqtalyp, óńirdiń óndiristik áleýeti kórsetiledi. Al «Bir aýyl — bir ónim» jobasynyń qatysýshylary aýyldyq jerlerde jasalǵan biregeı ónimderi men jergilikti brendterin usynady.
— Bıylǵy kórmeniń basty ereksheligi — onyń tek ónim tanystyratyn alańmen shektelmeı, naqty saýda jáne eksporttyq baılanystar ornatýǵa baǵyttalýy. Eki kún ishinde 500-den astam B2B kezdesý ótkizý josparlanǵan. Kelissózderge Qazaqstannyń saýda jelileri, gıpermarketter men sýpermarketter, kóterme saýda kompanııalary, dıstrıbıýtorlar, marketpleıster, logıstıkalyq jáne qarjy uıymdarynyń ókilderi qatysady. Sondaı-aq Ózbekstan, Qyrǵyzstan jáne Qytaıdan sheteldik ımporttaýshylar, dıstrıbıýtorlar men iskerlik seriktesterdiń qatysýy kózdelip otyr, — dedi «Atameken» Ulttyq kásipkerler palatasynyń Túrkistan oblysy boıynsha fılıalynyń dırektory Asylan Ibadýllaev.
18 qyrkúıekte «Qazaqstan úzdik taýary — 2026» óńirlik kórme-konkýrsynyń jeńimpazdaryn marapattaý rásimi ótedi. Baıqaý qorytyndysy boıynsha óndiristik maqsattaǵy, halyq tutynatyn jáne azyq-túlik taýarlary baǵytyndaǵy úzdikter anyqtalady.
Kórme-konkýrs baǵdarlamasyndaǵy mańyzdy sharalardyń biri — «MADE IN TURKISTAN: EXPORT 2026» eksporttyq forýmy. Forýmda kásipkerlerdiń sheteldik naryqtarǵa shyǵý múmkindikteri men eksporttyq áleýetin arttyrý máseleleri talqylanady. Oǵan «Atameken» QR Ulttyq kásipkerler palatasynyń, memlekettik organdardyń, damý ınstıtýttarynyń, qarjy uıymdarynyń, saýda jelileri men onlaın-saýda alańdarynyń ókilderi qatysady.
19 qyrkúıekte ınvestorlarmen arnaıy kezdesý ótkizilip, Túrkistan oblysynyń ınvestıtsııalyq jáne óndiristik múmkindikteri tanystyrylady. Investorlarǵa óńirdegi naqty óndiristerdiń jumysy kórsetilip, «Túrkistan Tekstıl» («Kazakstan Lihua»), «Qaz Natural Laminat», «QazEcoPack» jáne «Er-Qan Group» kásiporyndarynyń óndiristik nysandaryna barý uıymdastyrylady.
Sharanyń ekinshi kúninde kásipkerlerge arnalǵan BusinessGO tsıfrlyq platformasy tanystyrylady. Kezdesýde bólshek saýdany tsıfrlandyrý, kassa men taýar esebin júrgizý, fıskaldyq talaptardy saqtaý jáne kásipkerdiń kúndelikti jumysyn jeńildetetin tsıfrlyq quraldar týraly aqparat beriledi.
Uıymdastyrýshylardyń málimetinshe, eki kún ishinde kórmege 15 myńnan astam adam keledi dep josparlanyp otyr.
