Otandyq IT qyzmetter eksporty eki eseden astam ósti

ASTANA. KAZINFORM — Eki jyl ishinde Qazaqstannyń IT qyzmetter eksporty eki eseden astam ósip, jalpy quny 1,1 mlrd dollardan asty. Bul týraly Úkimet otyrysynda QR jasandy ıntellekt jáne tsıfrlyq damý birinshi vıtse-mınıstri Rostıslav Konıashkın málimdedi.

Rostıslav Konıashkın
Foto: Vıktor Fedıýnın/Kazinform

Onyń sózinshe, atalǵan kórsetkishtiń jartysynan astamyn Astana Hub rezıdentteri qamtamasyz etedi.

– Bıyl toǵyz aıda rezıdentter 317 mlrd teńgege eksport jasady. Bul shıkizattyq emes eksportqa oń áserin tıgizip, jańa jumys oryndary ashylyp jatqanyn bildiredi. Demek, naqty nátıje bar. Startapqa akseleratsııa, qarjy, shetel naryǵyna shyǵý sekildi ár kezeńde qoldaý kórsetemiz, – dedi Rostıslav Konıashkın.

Sonymen birge, onyń aıtýynsha, Astana Hub óńirlik IT-ekojúıeni damytý baǵytynda jumys júrgizip jatyr. Búginde Qazaqstanda 20 óńirlik IT-hab jumys isteıdi. Olardyń bazasynda 2,5 myńnan astam is-shara ótkizilgen.

Odan bólek, Qazaqstan halyqaralyq ınfraqurylymdy da keńeıtip keledi. Qazirgi tańda AQSh, Qytaı, BAÁ jáne Malaızııada tórt IT-hab jumys isteıdi. Olardyń baǵdarlamalarynan 61 qazaqstandyq startap ótti. Al 20 qarashada Ulybrıtanııada besinshi IT-habtyń ashylýy josparlanǵan.

Jasandy ıntellekt jáne tsıfrlyq damý birinshi vıtse-mınıstri Halyqaralyq habtar syrtqy naryqtarǵa shyǵý fýnktsııasyn oryndaıtynyn, álemdik saraptamaǵa qol jetkizýge múmkindik beretinin jáne sol arqyly otandyq IT-kompanııalardyń eksporttyq múmkindikterin keńeıtetinin atap ótti.

Aıta keteıik, buǵan deıin álemniń túkpir-túkpirinen IT mamandaryn Astana men Alatau City-ge tartý josparlanyp otyrǵanyn jazǵanbyz.