Otandyq ǵylymnyń aldynda el ekonomıkasyn dekarbonızatsııalaý mindeti tur - Prezıdent
ASTANA. KAZINFORM - Otandyq ǵylymnyń aldynda Qazaqstan ekonomıkasyn dekarbonızatsııalaýǵa baılanysty mańyzdy mindet tur. Bul týraly Prezıdent Qasym-Jomart Toqaev Ǵylym jáne tehnologııalar jónindegi ulttyq keńestiń otyrysynda aıtty.
«Otandyq ǵylymnyń aldynda Qazaqstan ekonomıkasyn dekarbonızatsııalaýǵa baılanysty mańyzdy mindet tur. Damyǵan elderdiń kóbi jańartylatyn energııa kózderine qatysty jobalardy belsendi iske asyrýda. Sondaı-aq olar kómirteksiz damýǵa kóship, jańa ekonomıkalyq klasterler qurý úshin qajetti tehnologııalyq áleýetke ıe. Bul saladaǵy jahandyq úrdister kóshinen qalmaý úshin bizge óz erekshelikterimiz eskerilgen tól ǵylymı ázirlemeler qajet.
Osy rette jerimizdiń qazba baılyǵy burynǵysha elimizdiń ekonomıkalyq ósiminiń negizi bolyp qala beretinin esten shyǵarmaǵan jón. Sondyqtan tabıǵı resýrstardy, sonyń ishinde kómirsýtegiler men sırek kezdesetin metaldardy óndirý salasyna ozyq tehnologııalardy engizý kerek. Іzdeý-barlaý jumystarynyń nátıjeli bolýyna mán berip, jańa ken oryndaryn ashý qajet. Ol úshin geologııa ǵylymyn sapaly damytý mańyzdy.
Jalpy, búkil otandyq ǵylymnyń áleýeti básekelestik artyqshylyqtarymyzdy tıimdi paıdalanýǵa jáne ǵylymdy qajet etetin jańa sektorlardy keńinen ıgerýge baǵyttalýǵa tıis»
