Otandyq ǵalymdardyń ázirlemeleri negizinde jańa zaýyt iske qosyldy

Joba Satbayev University ǵalymdarynyń qatysýymen otandyq joǵary oqý oryndary men ǵylymı uıymdarmen birlesip júzege asyryldy. Ǵylymı top retseptýralardy ázirleýden jáne shıkizatty irikteýden bastap tehnologııalyq protsesterdi baptaýǵa jáne serııalyq óndiristi iske qosýǵa deıingi jumystardyń tolyq tsıklin qamtamasyz etti.

Joba Memleket basshysy Qasym-Jomart Toqaevtyń ýnıversıtetter janynan tehnologııalyq parkter qurý jáne ǵylymdy ónerkásip salasyna ıntegratsııalaý jónindegi tapsyrmalaryn oryndaý aıasynda iske asyrylady. Diatomite zaýyty — Satbayev University bazasynda júzege asyrylyp jatqan Technopark Stroytech iri ınnovatsııalyq jobasynyń quramdas bóligi.

Ǵylym jáne joǵary bilim mınıstrliginiń qoldaýyna ıe bolǵan joba Satbayev University, D. Serikbaev atyndaǵy Shyǵys Qazaqstan tehnıkalyq ýnıversıteti, M.Áýezov atyndaǵy Ońtústik Qazaqstan ýnıversıteti, Metallýrgııa jáne ken baıytý ınstıtýty, sondaı-aq ındýstrııalyq seriktes — «Savenergy» kompanııasynyń qatysýymen júzege asyrylady.

— Bul joba — ýnıversıtetterdiń tek kadr daıarlaý ortalyǵy ǵana emes, sonymen qatar ındýstrııalyq damýdyń draıverine aınalýynyń naqty úlgisi. Mundaı tájirıbeni elimizdiń barlyq óńirinde keńinen taratý josparlanyp otyr, — dedi Ǵylym jáne joǵary bilim mınıstri Saıasat Nurbek.

Jobanyń negizgi ereksheligi — jergilikti mıneraldyq shıkizat pen qaıta óńdelgen ónerkásiptik qaldyqtardy paıdalaný. Satbayev University professory-zertteýshisi Rýslan Nurlybaevtyń aıtýynsha, ázirlengen tehnologııalar jańa qurylys materıaldaryn jasap qana qoımaı, olardy ónerkásiptik óndiriske sátti engizýge múmkindik berdi. Osylaısha, buryn paıdalanylmaǵan qaldyqtar qurylys salasy úshin suranysqa ıe resýrsqa aınalyp, ekologııalyq júktemeni azaıtýǵa jáne óndiristiń ekonomıkalyq tıimdiligin arttyrýǵa yqpal etedi.

Qoldanylatyn tehnologııalyq sheshimder patenttermen qorǵalǵan. Óndiriletin qurylys qospalary joǵary beriktik sıpattamalaryna ıe, ulttyq standarttarǵa sáıkes keledi jáne tıisti sertıfıkattaýdan ótken. Ónimder qazirdiń ózinde otandyq qurylys kompanııalary tarapynan qoldanylyp, olardyń sapasy men naryqtaǵy suranysyn rastap otyr.

QR jańa Konstıtýtsııasynda aıqyndalǵan eldiń strategııalyq baǵytyn iske asyrý aıasynda bilim men tehnologııaǵa negizdelgen ekonomıkany damytý aıryqsha mańyzǵa ıe. Osyǵan baılanysty ǵylymı qaýymdastyqty ekonomıkanyń qoldanbaly salalyq mindetterin sheshýge tartý basym baǵyttardyń biri.

Kásiporyn bazasynda jańa býyn mamandaryn daıarlaýǵa arnalǵan oqý-zerthanalyq keshen jumys isteıdi. Magıstranttar men doktoranttardyń ǵylymı zertteýlerge qatysýy, sondaı-aq ınnovatsııalyq qurylys materıaldaryn synaqtan ótkizý kózdelgen.

Aldaǵy ýaqytta ónim túrlerin keńeıtý, óndiristik qýattardy arttyrý jáne tehnologııalyq sheshimderdi elimizdiń ózge óńirlerindegi uqsas kásiporyndarda engizý josparlanǵan.