Otandyq ǵalymdar elektr energııasyn 30%-ǵa deıin únemdeıtin tehnologııa ázirledi
ASTANA. KAZINFORM – Qazaq sý sharýashylyǵy ǵylymı-zertteý ınstıtýtynyń ǵalymdary qubyrsyz sý kóterý tehnologııasyn ázirledi. Qazirgi ýaqytta joba óndiristik synaqtan ótkizilip, paıdalanylý kezeńinde.
Byltyr QazSShǴZI ázirlemesi Túrkistan fılıalynyń «Qazsýshar» RMK-ǵa qarasty Maqtaaral aýdanyndaǵy sý alý uńǵymalarynda dalalyq synaqtan ótti. Synaq qorytyndysy boıynsha tehnıkalyq jáne ekonomıkalyq turǵydan oń nátıjeler alyndy.
Atap aıtqanda, uńǵymalardy paıdalaný kezindegi metall shyǵyny 85%-ǵa deıin, elektr energııasyna jumsalatyn shyǵyn 30%-ǵa deıin azaıǵan. Sonymen qatar uńǵymalardyń ónimdiligi 20-40%-ǵa artsa, sorǵy jabdyǵyn montajdaý jáne demontajdaý kezindegi eńbek shyǵyny 70%-ǵa deıin tómendegen.
Osylaısha, dástúrli sý kóterý qubyrlarynan bas tartý esebinen aıtarlyqtaı ekonomıkalyq tıimdilikke qol jetkizilgen.
Sondaı-aq elektr júktemesiniń tómendeýi sorǵy agregatynyń qyzmet etý merzimin uzartýǵa jáne júıeniń jalpy energııa tıimdiligin arttyrýǵa múmkindik beredi.
– Qazirgi ýaqytta Qazaqstanda mundaı qurylǵylar óndirilmeıdi ári qoldanylmaıdy. Al yńǵaılylyǵy, senimdiligi jáne óndiriske engizýge daıyn bolýy jaǵynan olarmen salystyrýǵa keletin básekeles nemese balama sheshimder joq. Qazir jabdyqtyń ártúrli maýsymdyq jaǵdaılardaǵy jumysyna monıtorıng júrgizý jalǵasyp jatyr. Qubyrsyz sý kóterý tehnologııasynyń tehnıkalyq-ekonomıkalyq jáne óndiristik tıimdiligi boıynsha túpkilikti nátıjeler óndiristik synaqtardyń tolyq tsıkli aıaqtalǵannan keıin belgili bolady, – dedi Sý resýrstary jáne ırrıgatsııa vıtse-mınıstri Talǵat Momyshev.
Aıta keteıik, Qazaqstanda sý únemdeý tehnologııalaryn engizý qarqyny artyp keledi. 2026 jylǵy 1 qyrkúıektegi jaǵdaı boıynsha zamanaýı sýarý júıeleri 702,3 myń gektar sýarmaly jerge engizildi. 2030 jylǵa qaraı bul kórsetkishti 1,3 mln gektarǵa jetkizý josparlanyp otyr. Bul jyl saıyn 2,2 mlrd tekshe metrge deıin sý únemdeýge múmkindik beredi.
