Otandyq ǵalym tsıkorııdiń dıabetke qarsy qasıetin dáleldedi
ASTANA. KAZINFORM — Zertteý barysynda tsıkorıı quramyndaǵy bıologııalyq belsendi zattardyń qandaǵy qant deńgeıin tómendetýge, sondaı-aq zat almasý protsesin retteýge oń yqpal etetini anyqtaldy, dep habarlaıdy Ǵylym jáne joǵary bilim mınıstrligi.
Ál-Farabı atyndaǵy Qazaq ulttyq ýnıversıtetiniń aǵa oqytýshysy, jas ǵalym Aıjamal Baıseıitova tsıkorıı ósimdiginiń qasıetin jan-jaqty zerttep, onyń dıabetke qarsy tıimdi áseri bar ekenin ǵylymı turǵyda dáleldedi.
Zertteý barysynda tsıkorıı quramyndaǵy bıologııalyq belsendi zattardyń qandaǵy qant deńgeıin tómendetýge, sondaı-aq zat almasý protsesin retteýge oń yqpal etetini anyqtaldy. Sonymen qatar adam aǵzasynda stress áserinen paıda bolatyn radıkaldarǵa qarsy antıoksıdanttyq belsendiligi bar ekenin de dáleldedi. Bul ósimdiktiń densaýlyqty nyǵaıtýdaǵy áleýeti joǵary ekenin kórsetedi.
Ǵalymnyń aıtýynsha, qazirgi tańda atalǵan ǵylymı joba aıasynda halyqaralyq ǵylymı jýrnaldarda eki maqala jarııalanǵan.
— Bizdiń maqsatymyz — emdik qasıeti bar ósimdikter arqyly adam aǵzasynda jıi kezdesetin aýrýlarǵa qarsy bıologııalyq belsendi qospalar ázirleý. Qazirgi ýaqytta tsıkorıı ósimdiginiń fıtohımııalyq jáne farmakologııalyq qasıetterin zerttep jatyrmyz. Búginge deıin onyń dıabetke jáne streske qarsy belsendiligi anyqtaldy. Aldaǵy ýaqytta vırýstar men bakterııalarǵa, sonyń ishinde tumaý aýrýyna qarsy áserin zertteýdi josparlap otyrmyz, — deıdi jas ǵalym.
Atalǵan ınnovatsııalyq joba boıynsha QazUÝ ǵalymdary patent alǵan. Bolashaqta tsıkorıı negizinde daıyndalǵan ónimder bıologııalyq belsendi qospa jáne emdik shaı retinde óndirilip, otandyq naryqqa shyǵarý kózdeledi.
Aıjamal Baıseıitova ál-Farabı atyndaǵy QazUÝ-dyń Hımııa jáne hımııalyq tehnologııa fakýltetinde dáris beredi. Sonymen qatar ýnıversıtet janyndaǵy Dárilik ósimdikterdi ǵylymı-zertteý ortalyǵynda qyzmet atqarady. Ol Ońtústik Koreıadaǵy Kensan ulttyq ýnıversıtetinde magıstratýra men doktorantýrada bilim alyp, doktorlyq dárejesin sátti qorǵaǵan.
Budan buryn Qazaqstanda dıabetke shaldyqqan bir naýqasty emdeýge jylyna qansha qarjy jumsalatynyn jazǵanbyz.