Otandyq fýtbol klýbtaryn satyp alýǵa nıetti kásipkerler belgili boldy

ASTANA. KAZINFORM – Májilis depýtattarynyń saýalyna jaýap bergen Premer-mınıstr Oljas Bektenov otandyq fýtbol klýbtaryn satyp alýǵa nıetti kásipkerlerdi atady.

- Qazirgi tańda Memleket basshysynyń tapsyrmasyna sáıkes, Týrızm jáne sport mınıstrligi Qazaqstan fýtbol federatsııasymen birge oblystardyń jáne respýblıkalyq mańyzy bar qalalardyń ákimderin tarta otyryp, fýtbol klýbtaryn kommertsııalandyrý boıynsha óńirlerdegi jáne respýblıkadaǵy áleýetti ınvestorlarmen jumys júrgizýde. Osy jumystar aıasynda «Ortalyq Azııa otyn-energetıkalyq kompanııasy» AQ (Sergeı Kan) «Qyzyl-Jar» FK satyp alý múmkindigin qarastyrýda.

Freedom Finance (Tımýr Týrlov) «Shahter» FK úshin stadıon men fýtbol akademııasyn salýǵa qyzyǵýshylyq tanytýda.

Kaspi Group (Mıhaıl Lomtadze) «Jeńis» FK satyp alýdy jáne Astanada fýtbol ınfraqurylymyn salýdy kózdep otyr.

Qyzylordalyq áleýetti ınvestor «TAU GROUP LTD» (Islam Kozbakov) «Qaısar» FK satyp alýdy josparlaýda, - dedi Úkimet basshysy.

Sonymen qatar Premer-mınıstr «Taraz» FK, «Elimaı» FK jáne «Irtysh» FK fýtbol klýbtaryna qyzyǵýshylyq tanytqan ınvestorlarmen kezdesýler júrgizilgenin atap ótedi.

Aıta keteıik, osy jyldyń naýryzynda Býrabaıda ótken Ulttyq quryltaıdyń 4-otyrysynda Memleket basshysy fýtbol klýbtary oblystyq bıýdjetterge ǵana arqa súıemeı, shetelderdegi sekildi ózderi de tabys tabýdy úırenýi kerektigin aıtqan edi. 

Osydan keıin Týrızm jáne sport mınıstrligi otandyq fýtbol klýbtaryn jekeshelendirý boıynsha keshendi jol kartasy ázirledi.