Otandyq fılmderdiń halyqaralyq naryqqa shyǵý múmkindigi artady
ASTANA. KAZINFORM — «Kreatıvti ındýstrııalardy damytý qory» korporatıvtik qory men Tolqyn Film Fund yntymaqtastyq týraly memorandýmǵa qol qoıdy. Bul týraly vedomstvonyń baspasóz qyzmeti málim etti.
— Qujat kıno óndirisi men kreatıvti ındýstrııalar salasyndaǵy birlesken jobalardy júzege asyrýdy kózdeıdi. Ásirese ınvestıtsııalyq múmkindikterdi arttyrýǵa, otandyq jobalardyń básekege qabiletin kúsheıtýge jáne olardyń halyqaralyq naryqqa shyǵýyna basymdyq beriledi. Memorandým aıasynda birlesken jumys toptary men saraptama komıssııasyn qurý, salalyq forýmdar, konferentsııalar, semınarlar men dóńgelek ústelder ótkizý máseleleri de qarastyrylǵan, — delingen vedomstvonyń habarlamasynda.
Yntymaqtastyq sheńberinde kıno óndirisi, creative-tech, tsıfrlyq kontent, medıa jáne ınvestıtsııalyq jobalar salasyndaǵy bastamalardy qoldaý josparlanǵan. Sonymen qatar qazaqstandyq kreatıvti jobalardy halyqaralyq deńgeıde ilgeriletýge qolaıly jaǵdaı jasaý kózdelip otyr.
Atalǵan memorandým Qazaqstandaǵy kreatıvti ekonomıkanyń damýyna tyń serpin berip, halyqaralyq seriktestikti tereńdetýge jáne shyǵarmashylyq ındýstrııa ókilderi úshin jańa múmkindikterge jol ashýǵa yqpal etedi.
Aıta keteıik, buǵan deıin Qor MOST Holding jeke venchýrlik qorymen de memorandýmǵa qol qoıǵan bolatyn. Taraptar birlesken bilim berý jáne akseleratsııalyq baǵdarlamalardy júzege asyrýdy josparlap otyr.
Eske sala ketsek, 2026 jylǵy 25 sáýirde Memleket basshysyna Kreatıvti ındýstrııalardy damytý qorynyń keńsesi men negizgi qyzmet baǵyttary tanystyryldy. Búginde Almaty men Astanada kreatorlar, salalyq qaýymdastyqtar jáne shyǵarmashylyq orta ókilderiniń qatysýymen Kreatıvti ındýstrııalardy damytý tujyrymdamasyn talqylaýǵa arnalǵan strategııalyq sessııalar ótkizildi. Sondaı-aq óńirlerdiń qatysýymen onlaın formattaǵy kezdesýler uıymdastyryldy.
Budan bólek, bıyl sáýir aıynda Qor Astana Eurasian Book Fair halyqaralyq kitap festıvalin uıymdastyrý jáne ótkizý jumystaryna atsalysty.
Sonymen qatar Qordyń alǵashqy bastamalarynyń biri — ulttyq qolóner men beıneleý ónerin saqtaýǵa jáne damytýǵa baǵyttalǵan «Halyq qolóneri jáne beıneleý óneri mektebi» jobasy. Bastama sırek kezdesetin dástúrli kásip túrlerin jańǵyrtyp, ulttyq ónerdiń tamyryn úzbeı, sheberlerdiń tájirıbesin jas býynǵa dáripteýdi kózdeıdi.
— Jobaǵa qatysý úshin 330 ótinim túsip, onyń 271-i maquldandy. Ótinim elimizdiń ár óńirinen kelip tústi. Qatysýshylar dástúrli tekstıl men kıiz, sándik-qoldanbaly óner, ulttyq kıim, zergerlik óner, aǵash jáne teri óńdeý, keramıka, mýzykalyq aspap jasaý baǵyttary boıynsha portfolıo usyndy, — dep habarlady mınıstrlikten.
Sondaı-aq joba aıasynda qazaqtyń sırek kezdesetin qolóner túrlerin dáriptep júrgen sheberler de anyqtaldy. Olardyń qatarynda súıek oıý óneri, shym shı toqý, qamshy órý, at ábzelderi, saıatshylyq buıymdaryn jasaý isiniń jáne basqa da baǵyttardy meńgergen sheberler bar.
Endi sheberler jobanyń granttyq baıqaýyna qatysady. Sonymen qatar olarǵa jastarǵa arnalǵan oqý baǵdarlamalary men sheberlik sabaqtaryn ótkizý múmkindigi beriledi.
Aldaǵy ýaqytta Qor óńirlerdegi shyǵarmashylyq bastamalardy qoldaýǵa baǵyttalǵan Creative Aimaq aptalyq festıvalin júzege asyrýdy josparlap otyr.
Aıta keteıik, Almatyda memlekettik qarjylandyrýǵa úmitker 95 kınojoba baıqaýǵa qatysyp jatyr.
