Otandyq fılm halyqaralyq kınofestıvaldyń laýreaty atandy

ASTANA. KAZINFORM – «Pobedıteleı vıdno na starte» otandyq fılmi Tallınde ótken «Qara túnder» halyqaralyq kınofestıvaliniń laýreaty atandy. Bul týraly Mádenıet jáne aqparat mınıstrliginiń baspasóz qyzmeti habarlady. 

21 qarashada Tallın qalasynda ótken «Qara túnder» (Tallinn Black Nights Film Festival, PÖFF) halyqaralyq kınofestıvaliniń jabylý saltanatynda qazaqstandyq «Pobedıteleı vıdno na starte» (Becoming) fılmi bedeldi marapatqa ıe boldy. Fılmniń rejısseri ári prodıýseri Jannat Alshanova «Koprodýktsııa» sanatynda «Eń úzdik baltyq óńiri prodıýseri» júldesin ıelendi.

Jannat Alshanovanyń tolyqmetrajdy debıýttik jumysy – «Accidental Films» JShS túsirgen kartına. Fılm Qazaqstan Respýblıkasynyń Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen túsirildi. Joba halyqaralyq yntymaqtastyq aıasynda Frantsııanyń (Films de Force Majeure), Nıderlandtyń (Volya Films), Lıtvanyń (M-Films), Shvetsııanyń (Kjellson & Wik) prodıýserlik kompanııalarymen jáne Saýd Arabııasy Koroldiginiń qoldaýymen túsirilgen.

Fılmde 17 jastaǵy Mıla esimdi qyzdyń oqıǵasy baıandalady. Ol júzgishter komandasyna qosylǵysy keledi. Sóıtip erkin ómir súrip, otbasyndaǵy qıyndyqtan qutylmaq bolady. Alaıda márege jeter tusta onyń ómirin ózgertetin tańdaý jasaýǵa týra keledi. Fılmde basty rólderdi aktrısa Tamırıs Janǵazınova, lıtvalyq akter Valentın Novopolskıı, Ásel Qalıeva jáne Medına Saǵyndyqova oınaıdy.

Fılmniń álemdik premerasy 2025 jyldyń tamyz aıynda Lokarno halyqaralyq kınofestıvalinde ótti. Keıin týyndy Ońtústik Koreıadaǵy Pýsan halyqaralyq kınofestıvaliniń baǵdarlamasyna endi.

Bul marapat qazaqstandyq kınoǵa degen qyzyǵýshylyqtyń artyp kele jatqanyn kórsetip, salaǵa bólingen memlekettik qoldaýdyń nátıjeli ekenin aıqyndaıdy. 

Aıta ketelik Djekı Channyń «Qudiretti saýyt» fılminiń jalǵasy Mańǵystaýda túsirilýi múmkin.