Otandyq farmatsevtıkalyq ónimniń kólemi qanshalyqty artty

ASTANA. KAZINFORM — Qazaqstandaǵy farmatsevtıka salasyndaǵy óndirýshilermen uzaq merzimdi sharttar bekitilip jatyr. Bul týraly QR Densaýlyq saqtaý mınıstrliginen málim etti.

— 2024 jyldyń qorytyndysy boıynsha qazaqstandyq farmatsevtıkalyq óndirýshiler 2023 jyldyń sáıkes kezeńimen salystyrǵanda 25,7 paıyzǵa artyq ónim shyǵardy. Qazirgi ýaqytta (2025 jylǵy 1 tamyzdaǵy jaǵdaı boıynsha) 32 qazaqstandyq taýar óndirýshimen 2291 ataýdy, onyń ishinde 462 dárilik preparatty jáne 1829 medıtsınalyq zatty jetkizýge 88 uzaq merzimdi shart jasaldy. Bul turǵyda dári-dármek boıynsha 41 shart, al medıtsınalyq zattarǵa 47 uzaq merzimdi shart bekitildi, — delingen mınıstrliktiń Kazinform agenttigine bergen jaýabynda.

Sonymen qatar, Pfizer (AQSh), Hoffmann-La Roche (Shveıtsarııa), AstraZeneca AB (Ulybrıtanııa) kompanııasymen 6 túpnusqa patenttelgen dárilik zatty jetkizý úshin kelisimsharttyq óndiriske arnalǵan uzaq merzimdi sharttar jasaldy.

Budan buryn habarlanǵandaı, densaýlyq saqtaý júıesinde dári-dármek baǵasyn 30 paıyzǵa deıin tómendetý sharalary qabyldanbaq.

Qazir farmatsevtıka salasynda 2029 jylǵa deıin otandyq dári-dármek óndirisi úlesin 50%-ǵa jetkizý jónindegi tapsyrmany oryndaý boıynsha sharalar qabyldanýda. Aıta keteıik, buǵan deıin otandyq dári-dármek úlesin 50 paıyzǵa jetkizý úshin 7 joba qarastyrylyp jatqanyn jazǵan edik.