Otandyq dárigerler donorlyq aǵzany tasymaldaýdyń jańa júıesin ázirledi

Bul týraly «University Medical Center» korporatıvtik qory Medıtsınalyq jáne retteýshi máseleler departamentiniń bas menedjeri, transplantatsııa jónindegi úılestirýshi Sáýle Shaısultanova aıtty. 

Onyń sózinshe, qaıtys bolǵan donor elimizdiń kez kelgen óńirinen tabylýy múmkin. Sondyqtan transplantatsııa protsesiniń mańyzdy kezeńderiniń biri — donorlyq aǵzalardy óńirler arasynda jedel tasymaldaý.

— Donorlar Qazaqstannyń kez kelgen aımaǵynda bolýy múmkin. Sondyqtan elimizde transplantatsııa júrgizile bastaǵan 2012 jyldan beri beri donorlyq aǵzalar túrli óńirlerden transplantatsııa ortalyqtaryna jetkizilip keledi. Bul — kúndelikti atqarylatyn jumystyń bir bóligi, — dedi ol.

Sáýle Shaısultanova donorlyq aǵzalardy tasymaldaýda ýaqyttyń sheshýshi ról atqaratynyn atap ótti. Ásirese júrek transplantatsııasynda ár saǵattyń mańyzy zor.

— Máselen, júrek aǵzadan alynǵannan keıin tórt saǵat ishinde basqa adamǵa salynýy tıis, ıaǵnı osy ýaqyt ishinde aǵza alynyp, tasymaldanyp, retsıpıentke sátti transplantatsııalanýy qajet. Qazaqstannyń jeri keń bolǵandyqtan, mundaı qysqa merzimde aǵzany alys óńirlerge jetkizý árdaıym ońaı emes, — dedi ol.

Onyń aıtýynsha, bul máseleni sheshý úshin qazir qazaqstandyq dárigerler amerıkalyq tasymaldaý júıesin paıdalanyp jatyr. Alaıda onyń quny qymbat. 

— Sondyqtan da bizdiń áriptesterimiz donorlyq aǵzalardy tasymaldaýǵa arnalǵan biregeı júıe ázirledi. Qazir ol klınıkaǵa deıingi zertteý kezeńinen ótip jatyr. Bolashaqta osy tehnologııanyń arqasynda donorlyq aǵzalardy anaǵurlym uzaq ýaqyt saqtap, uzaq qashyqtyqqa jetkizý múmkindigi artady. Bul elimizdiń ártúrli óńirlerinde transplantatsııany uıymdastyrýǵa qosymsha múmkindik beredi, — dedi Sáýle Shaısultanova.

Eske salaıyq, elimizde donorlyq aǵzaǵa muqtaj 4739 adam transplantatsııa kezeginde tur. Olardyń 125-i — balalar.