Otandyq dári-dármek óndirisinde ilgerileý bar ma
ASTANA. KAZINFORM – QR Densaýlyq saqtaý mınıstrligi dári-dármek óndirý salasynda otandyq óndiristiń úlesine qatysty túsinik berdi.
— 2023 jyldyń qorytyndysy boıynsha otandyq taýar óndirýshiler (OTÓ) óndirisiniń úlesi 14,4 paıyzǵa deıin tómendedi. Qabyldanǵan sharalar jıyntyǵynda COVID-19 pandemııasynyń aıaqtalýyna baılanysty OTÓ óndirisi kóleminiń qysqarýyn turaqtandyrýǵa múmkindik berdi (2024 jyly OTÓ óniminiń úlesi — 15,1%). Bul turǵyda 2024 jyldyń qorytyndysy boıynsha farmatsevtıkalyq ónim óndirisiniń kólemi 171,6 mlrd teńgeni qurady jáne OTÓ óndirisiniń 21,8 paıyzǵa óskeni baıqaldy. Al 2023 jyldyń uqsas kezeńinde 140,9 mlrd teńgege jetken edi. Byltyr farmatsevtıkalyq salaǵa tartylǵan ınvestıtsııalar kólemi 2 ese ulǵaıdy (2023 jylǵy 46,9 mln AQSh dollarynan 2024 jyly 91,3 mln AQSh dollaryna deıin), - delingen mınıstrliktiń Kazinform agenttigine bergen jaýabynda.
Negizgi óndiristik qýattar Shymkent, Almaty qalalarynda, Almaty, Aqtóbe, Jambyl jáne Qaraǵandy oblystarynda ornalasqan. Atalǵan óńirlerde qant dıabeti, júrek-qan tamyry aýrýlary men onkologııa sııaqty aýrýlardy emdeý úshin ómirlik mańyzy bar ónimder, sondaı-aq medıtsınalyq zattar shyǵarylady. OTÓ-ni qoldaý aıasynda uzaq merzimdi sharttar iske asyrylyp jatyr. Qazirgi kezde kóptegen otandyq jáne iri sheteldik kompanııalar Qazaqstan aýmaǵynda óndiristi ornalastyrýǵa talpynyp otyr. Investıtsııalar týraly kelisimder (ınvestıtsııalardyń eń tómengi shegi 29,5 mlrd teńge) jasasý arqyly otandyq óndirýshilermen uzaq merzimdi sharttardyń kólemi men nomenklatýrasyn keńeıtý josparlanǵan.
— Dárilik zattardy mindetti túrde tańbalaý engizildi, ınspektoratty nyǵaıtý jáne olardyń aınalymy boıynsha retteýshilik deńgeıdi arttyrý júzege asyrylyp jatyr. Osylaısha, osy baǵyttaǵy jumys jalǵasýda jáne jalpy alǵanda, 2029 jyldyń sońyna qaraı OTÓ óniminiń úlesin 50% -ǵa deıin jetkizý maqsaty qoıyldy, — dep atalyp ótken vedomstvo aqparatynda.
Buǵan deıin elde bólshek jáne kóterme saýdada ótkizý úshin dárilik zattardyń 6 myńnan asa saýdalyq ataýyna shekti baǵalar bekitilgenin jazǵan edik.