Otandyq baspa isiniń ardageri Almıra Sýjıkova dúnıeden ótti
ASTANA. KAZINFORM — Otandyq baspa isiniń ardageri, belgili redaktor ári avtor, «Qurmet» ordeniniń ıegeri Almıra Sýjıkova dúnıeden ótti. Bul týraly Mádenıet jáne aqparat mınıstrligi habarlady.
— Mádenıet jáne aqparat mınıstrligi otandyq baspa isiniń ardageri, belgili redaktor ári avtor, «Qurmet» ordeniniń ıegeri Almıra Úmbetqyzy Sýjıkovanyń dúnıeden ozýyna baılanysty otbasy men týǵan-týystaryna, jaqyndary men áriptesterine qaıǵyryp kóńil aıtady, — delingen mınıstrlik habarlamasynda.
Almıra Úmbetqyzy talaı qalamger men jas mamanǵa baǵyt-baǵdar bergen bilikti maman, taǵylymy mol tálimger edi. Ol otandyq kitap shyǵarý isiniń damýyna eleýli úles qosty. Jarty ǵasyrǵa jýyq ýaqyt boıy «Almatykitap» baspasynda eńbek etip, mazmuny tereń, kórkemdik deńgeıi joǵary kóptegen basylymnyń jaryq kórýine atsalysty.
«Meniń Qazaqstanym» serııasyndaǵy ulttyq kıim, salt-dástúr men tarıhı tulǵalar týraly eńbekterge, Abaı, Ybyraı, Ahmet jáne Shoqanǵa arnalǵan tanymdyq kitaptarǵa, balalar ádebıeti men entsıklopedııalyq, ólketaný basylymdaryna onyń avtorlyq jáne redaktorlyq eńbegi sińdi. Bul týyndylar talaı oqyrmannyń rýhanı serigine aınalyp, jas urpaqtyń týǵan eldiń tarıhy men mádenıetine qyzyǵýshylyǵyn arttyrdy.
Almıra Úmbetqyzy kásibine adaldyǵymen, bıik talǵamymen áriptesteriniń aıryqsha qurmetine bólendi. Onyń ónegeli ǵumyry men jarqyn beınesi týǵan-týystarynyń, áriptesteri men oqyrmandarynyń júreginde saqtalyp, artynda qaldyrǵan mol murasy el ıgiligine qyzmet ete beredi.
